საქართველო არ მიიღებს მონაწილეობას 3+3 პლატფორმის მომავალ შეხვედრაში, რომელიც თურქეთში გაიმართება. განაცხადა Daily sabah-თან საუბრისას საქართველოს ელჩმა თურქეთის რესპუბლიკაში გიორგი ჯანჯღავამ.
რამდენიმე დღით ადრე, თურქეთის საგარეო საქმეთა მინისტრმა მევლუთ ჩავუშოღლუმ ისლამაბადში "ისლამური თანამშრომლობის ორგანიზაციის/; (OIC) შეხვედრაზე განაცხადა, რომ თურქეთი იმედოვნებს, საქართველო დაესწრება 3+3 პლატფორმის მომავალ შეხვედრას.
Daily sabah-თან საუბრისას, თურქეთში საქართველოს ელჩმა განაცხადა, საქართველო თურქეთსა და აზერბაიჯანს სტრატეგიულ პარტნიორებად განიხილავს, ხოლო სომხეთს ისტორიულ და კარგ მეზობლად.
"მაგრამ რუსეთი არის ქვეყანა, რომელსაც საქართველოს ტერიტორიის 20% აქვს ოკუპირებული", - დასძინა ელჩმა.
გასული წლის 10 დეკემბერს მოსკოვში, 3+3 ფორმატის ფარგლებში, რუსეთის, თურქეთის, ირანის, სომხეთისა და აზერბაიჯანის საგარეო საქმეთა მინისტრების მოადგილეების დონეზე, პირველი შეხვედრა გაიმართა. ამ შეხვედრას საქართველო არ ესწრებოდა, თუმცა დროშა მაინც იყო წარმოდგენილი. შეხვედრაზე ქართული დროშის წარმოდგენას საქართველოს საგარეო საქმეთა სამინისტრომ მიუღებელი უწოდა.
თურქეთის პრეზიდენტმა რეჯეპ ტაიპ ერდოღანმა "სამხრეთ კავკასიაში ექვსი ქვეყნის პლატფორმის" შექმნის იდეა 10 დეკემბერს ბაქოში წამოაყენა.
ერდოღანის მტკიცებით, პლატფორმა გულისხმობს ირანის, რუსეთის, თურქეთის, საქართველოს, სომხეთისა და აზერბაჯიანის თანამშრომლობას, რომელიც ფოკუსირებული იქნება უსაფრთხოების, ეკონომიკურ და სატრანსპორტო საკითხებზე.
საქართველოს საგარეო საქმეთა სამინისტროს განცხადებით, საქართველო არ განიხილავს ოკუპანტ რუსეთის ფედერაციასთან ერთად 3+3 ფორმატში მონაწილეობას.
