საპარლამენტო ოპოზიციის ნაწილი სახელმწიფო ინსპექტორის სამსახურის გაუქმების კანონპროექტის განხილვის შეჩერებას ითხოვს.
ოპოზიციურმა პარტიებმა, მათ შორის, "ნაციონალურმა მოძრაობამ", "ლელომ", "სტრატეგია აღმაშენებელმა", "კანონი და სამართლისა" და "რეპუბლიკელების" წარმომადგენლებმა ინიცირებულ კანონპროექტთან დაკავშირებით პარლამენტში საგანგებო ბრიფინგი გამართეს.
"კანონპროექტი მიზნად ისახავს სახელმწიფო ინსპექტორის სამსახურის გაუქმებას და პარლამენტის მიერ არჩეული სახელმწიფო ინსპექტორის თანამდებობიდან ჩამოცილებას. ჩვენ მიგვაჩნია, რომ აღნინშული კანონპროექტი გარდა იმისა, რომ ამ ინსტიტუციას უთხრის ძირს, უმრავლესობის მხრიდან წარმოადგენს ღია გზავნილს ყველა მათგან დამოუკიდებელი და საჯარო მოხელეების მიმართ, რომ ისინი დაისჯებიან საკუთარი პროფესიული მოვალეობების შესრულებისთვის. ასევე, საგანგაშოა ის, რომ ახალი წლის წინა კვირაში ეს ინიციატივა მომზადდა ყველასგან ფარულად", - თქვა "ლელოს" წარმომადგენელმა, ანა ნაცვლიშვილმა.
"ნაციონალური მოძრაობის" წევრი თინა ბოკუჩავა კანონპროექტს სახელმწიფო ინსპექტორის სამსახურის მიერ მიხეილ სააკაშვილის მიმართ განხორციელებული არაადამიანური მოპყრობის საქმეზე წამოწყებული გამოძიების შეჩერებას უკავშირებს.
"ინსპექტორის სამსახურმა დაიწყო გამოძიება პრეზიდენტ სააკაშვილის მიმართ არაადამინური მოპყრობის ფაქტზე, ეს ნაბიჯი, რომელსაც რეფორმას და რესტრუქტურიზაციას არქმევს ივანიშვილის რეჟიმი, სინამდვილეში მიმართულია იმისკენ, რომ შეჩერდეს აღნიშნული გამოძიება და გადაეცეს ადამიანს, რომელიც არასოდეს დაადგენს სიმართლეს. ეს არის გზავნილი პირადად ლონდა თოლორაიას მიმართ, რომელიც ახლა იმყოფება დეკრეტულ შვებულებაში და თავად განაცხადა, რომ ეს კონკრეტული მომენტი ანგარიშსწორებისთვის შეირჩა", - თქვა თინა ბოკუჩავამ.
ცოტა ხნით ადრე, "ქართული ოცნების" თავმჯდომარემ, ირაკლი კობახიძემ განაცხადა, რომ მმართველ პარტიას არავითარ პრობლემა არ აქვს ლონდა თოლორაიასთან და საქმე ეხება, მხოლოდ ინსტიტუციურ და სამართლებრვი რეფორმას.
შეგახსენებთ, მმართველმა პარტიამ პარლამენტში წარადგინა კანონპროექტი, რომელიც სახელმწიფო ინსპექტორის სამსახურის გაუქმებას და მის ნაცვლად ორი დამოუკიდებელი უწყების ჩამოყალიბებას ითვალისწინებს.
სახელმწიფო ინსპექტორის ლონდა თოლორაიას განცხადებით, კანონპროექტის ინიცირების თაობაზე მედიის საშუალებით შეიტყო. მისი თქმით, დამოუკიდებელი სამსახურის ლიკვიდაცია ძალიან საშიში პრეცენდეტია. ლონდა თოლორაიამ მოუწოდა პარლამენტს, შეწყვიტოს სამსახურის ლიკვიდაციისთვის წამოწყებული პროცესი.
კანონპროეტს გამოეხმაურა არასამთავრობო სექტორი, რომელმაც სამსახურის გაუქმება შეაფასა, როგორც "ხელისუფლების მხრიდან, კიდევ ერთი დამოუკიდებელ ორგანოზე თავდასხმა".