უკრაინის პრეზიდენტ ვოლოდიმირ ზელენსკის განცხადებით, კიევი ნატოსგან 2022 წელს გაწევრიანების მკაფიო ვადების მიღებას მოელის. იუწყება "ევროპეისკაია პრავდა".
"ვერ გავიზიარებთ იმ თეზისს, რომელიც დღეს ასე პოპულარულია, რომ ევროკავშირში 30 წელში გავწევრიანდებით, ნატოში კი ოდესღაც, 50 წელში. ეს იწვევს ჩვენს დემოტივაციას და პროცესს აფერხებს", - თქვა ზელენსკიმ.
მისი თქმით, უკრაინა ისწრაფვის, რომ ევროკავშირში უახლოეს წლებში გაწევრიანდეს, ხოლო ნატოსგან ალიანსში გაწევრიანების ძალიან მკაფიო ვადების მიიღოს.
პრეზიდენტ ზელენსკის ამ განცხადების ფონია, რუსეთის დაჟინებული მოთხოვნა, რომ ნატომ ხელი აიღოს აღმოსავლეთით გაფართოებაზე.
17 დეკემბერს რუსეთის საგარეო საქმეთა სამინისტრომ გამოაქვეყნა წინადადებები უსაფრთხოების გარანტიებთან დაკავშირებით, რომლის თანახმადაც, ჩრდილოატლანტიკურმა ალიანსმა უარი უნდა თქვას აღმოსავლეთით გაფართოებასა და ყოფილი პოსტსაბჭოთა ქვეყნების მიღებაზე, ასევე უარი თქვას უკრაინასა და საქართველოსთან სამხედრო თანამშრომლობაზე.
