ე.წ. სამხრეთ ოსეთში "აფრიკული ღორის ჭირის" დაავადება გავრცელდა. ინფორმაციას ამის შესახებ ე.წ. სამხრეთ ოსეთის ბეჭდვისა და ინფორმაციის კომიტეტი ავრცელებს.
სეპარატისტული სამხრეთ ოსეთის ე.წ. სოფლის მეურნეობის სამმართველოს უფროსის ვლადიმერ ლოლაევის ინფორმაციით, ე.წ. სამხრეთ ოსეთში ღორის ხორცის გაყიდვაზე, გატანაზე და შეტანაზე უკვე დაწესებულია მკაცრი აკრძალვა.
"ეპიდემია ადამიანებისათვის საშიშროებას არ წარმოადგენს. დაზარალდნენ მხოლოდ ფერმერული მეურნეობები და საქონლის მეპატრონეები", _ აცხადებს ლოლაევი.
"აფრიკული ღორის ჭირი" დაფიქსირებულია ჯავის რაიონის სოფელ სინაგურში, ახალგორის რაიონის სოფელ ორჭოსანში, ახალგორში ასევე ზნაურის რაიონის სოფლებში.
ლოლაევის ინფორმაციით, ამჟამად ამ რაიონებში კარანტინია გამოცხადებული და შესაბამისი ღონისძიებები ტარდება. თუმცა ლოლაევი ასევე აცხადებს, რომ ამ დაავადებასთან ბრძოლისათვის მათ პრეპარატი "ადელინ-სუპერი" სჭირდებათ, რომლის შეძენა ე.წ. სამხრეთ ოსეთის ტერიტორიაზე შეუძლებელია ამიტომაც იგი ჩრდილოეთ ოსეთში უნდა შეიძინონ.
მასალის გამოყენების პირობები