ანტიფსიქოზური პრეპარატების არადანიშნულებისამებრ დანიშვნა განიხილება როგორც ფარმაკოლოგიური წამება, - აცხადებს ცენტრ "ემპათიას" ხელმძღვანელი, მარიამ ჯიშკარიანი "მთავარ არხთან საუბრისას.
მისი თქმით, საუბარია არა ჰოლანდიაში დანიშნულ, არამედ, ანტიფსიქოზურ პრეპარატზე. ჯიშკარიანი აღნიშნულთან დაკავშირებით გამოძიების დაწყებას მოითხოვს.
"გარკვეული კორექტირება მოვახდინეთ მის დანიშნულებაში. არაადეკვატურად იღებდა ის ფსიქოტროპულ პრეპარატს, ანუ ანტიფსიქოზურ პრეპარატზეა საუბარი და არა იმ დანიშნულებაზე, რაც მას ჰოლანდიაში ჰქონდა დანიშნული. შესაბამისად, დასკვნაში ასახული იქნება ყველა ეს გარემოება.
ფსიქოტროპული პრეპარატების, განსაკუთრებით ანტიფსიქოზური პრეპარატების არადანიშნულებისამებრ დანიშვნა განიხილება როგორც ფარმაკოლოგიური წამება.
ამდაგვარი წამების მეთოდი მიზნად ისახავს, ადამიანის გატეხვას, პიროვნულ დამორჩილებასა და მისი ფიზიოლოგიური და ფსიქიკური ფუნქციონირების დაქვეითებას.
რას ემსახურებოდა ეს, იყო ეს საექიმო შეცდომით დანიშნული, თუ რაიმე განზრახვას ემსახურებოდა, ეს უნდა გამოიკვეთოს გამოძიების მსვლელობისას, - თქვა მარიამ ჯიშკარიანმა.
შეგახსენებთ, მარიამ ჯიშკარიანმა 4 დეკემბერს განაცხადა, რომ მიხეილ სააკაშვილს "არასაჭირო ნეიროლეფსიური პრეპარატებს ასმევენ". ჯიშკარიანის ამ განცხადებას გორის სამხედრო ჰოსპიტალში მიხეილ სააკაშვილის პირადი ექიმი ნინო გოგორიშვილი გამოეხმაურა.
