მიხეილ სააკაშვილის ჯანმრთელობის მდგომარეობა დამაკმაყოფილებელია, – ამის შესახებ ყოფილი პრეზიდენტის მკურნალმა ექიმმა, ნინო გოგორიშვილმა ჟურნალისტებს განუცხადა.
ნინო გოგორიშვილის განმარტებით, პაციენტის ლაბორატორიული ანალიზები ნორმის ფარგლებშია, თუმცა აღენიშნება მცირედი სისუსტე. მისივე თქმით, ენდოკრინოლოგებთან შეთანხმებით, კვების რაციონი გაფართოვდა.
„დღეისთვის, პაციენტის მდგომარეობა დამაკმაყოფილებელია, აღენიშნება მცირე სისუსტე, ლაბორატორიული ანალიზები ნორმის ფარგლებში არის. კვების რაციონი არის გაფართოებული და თითქმის არის უკვე სრული მენიუთი, შედგენილია ენდოკრინოლოგების სრული შეთანხმებით და ძალის აღდგენა მიდის.
დაიწყო უკვე ძალის გააქტიურება და ბატონი მიხეილი ემზადება სასამართლოსთვის. შემიძლია, ვთქვა, რომ დღეისთვის მისი მდგომარეობა დამაკმაყოფილებელია. ვფიქრობ, რომ იქნება მზად სასამართლოსთვის“, – განაცხადა ნინო გოგორიშვილმა.
ცოტა ხნით ადრე, ცენტრ "ემპათიის" ხელმძღვანელმა, მარიამ ჯიშკარიანმა, რომელმაც საქართველოს მესამე პრეზიდენტი გორის ჰოსპიტალში მოინახულა, განცხადა, მიხეილ სააკაშვილის ჯანმრთელობის მდგომარეობა მის სასამართლოზე დასწრების შესაძლებლობას იძლევა.
მიხეილ სააკაშვილის სასამართლო სხდომა, 7 ნოემბრის საქმეზე, 29 ნოემბერს არის ჩანიშნული. როგორც ადვოკატები იუწყებიან, მიხეილ სააკაშვილს სურს პირადად დაესწროს საქმის განხილვას, თუმცა ჯერჯერობით სპეციალური პენიტენციური სამსახურის გადაწყვეტილება უცნობია.