სამცხე-ჯავახეთში არსებული ქართული ისტორიული ძეგლების სარეაბილიტაციო სამუშაოები სრულდება.
სამცხე-ჯავახეთში არსებულ ძეგლებზე 2010 წლის გეგმით გათვალისწინებული სამუშაოები დღეს საქართველოს კულტურული მემკვიდრეობის დაცვის ეროვნული სააგენტოს გენერალურმა დირექტორმა ნიკოლოზ ვაჩეიშვილმა მოინახულა.
ვარძიის სამონასტრო კომპლექსში გეგმით გათვალისწინებული სამუშოები უკვე დასრულებულია, მოწყობილია სპეციალური ტურისტული ბილიკები. მოეწყო წყლის სისტემებიც.
ახალი, ისტორიული გზა, რომელიც სამცხე-ჯავახეთში გაკეთდა, დამთვალიერებლებს საშუალებას აძლევს, ხერთვისიდან ვარძიამდე მოინახულონ თმოგვის ციხე, წუნდის ეკლესია და ვანის ქვაბების სამონასტრო კომპლექსი.
ყოველწლიური, აუცილებელი გაწმენდითი სამუშაოები ვარძიაში დასრულებულია. სამცხე-ჯავახეთის ტერიტორიაზე ამჟამად სარეაბილიტაციო სამუშაოები საფარის სამონასტრო კომპლექსსა და ტიმოთეს უბნის ეკლესიაში მიმდინარეობს.