გორის სამხედრო ჰოსპიტალთან, მიხეილ სააკაშვილის მოსანახულებლად, მისი უკრაინელი ადვოკატი ევგენი გრუშოვეცი მივიდა, რომელიც საქართველოს ექსპრეზიდენტის საქმეში ჩართვას ითხოვს.
გრუშოვეცის მტკიცებით, სააკაშვილის წინააღმდეგ აღძრული საქმეები პოლიტიკურად მოტივირებულია.
"მიმაჩნია, რომ ეს არის პოლიტიკური საქმე, რადგან უკრაინაში ასეთი მუხლებით, რომლებითაც მას აქვს ბრალი წარდგენილი, პრაქტიკულად არავინ იმყოფება ციხეში. ჩემთვის ძალიან მნიშვნელოვანია მიხეილთან შეხვედრა, მასთან განსაზღვრა, თუ რა გავაკეთოთ შემდგომ, რადგან დახმარების სხვადასხვა ვარიანტი არსებობს, კლიენტის გარეშე კი, ჩვენ ვერანაირ მოქმედებებს ვერ განვახორციელებთ. ამასთან, ჩვენ ვგეგმავთ, განვავითაროთ დაცვის ევროპული ვექტორი, რადგან პოლიტიკურ საქმეებში არ შეიძლება, შემოიფარგლო ერთი ან მეორე სახელმწიფოს ტერიტორიით. ვიმედოვნებ, რომ მე შემიშვებენ ჰოსპიტალში და შევხვდები მიხეილს. ჩვენ განვსაზღვრავთ, თუ როგორ გავაგრძელებთ მის დახმარებას", - განაცხადა ევგენი გრუშოვეცმა.