ალერგოლოგ-იმუნოლოგი, ბიძინა კულუმბეგოვი საქართველოს მესამე პრეზიდენტის, მიხეილ სააკაშვილის სამოქალაქო კლინიკაშ გადაყვანას ითხოვს. ამის შესახებ ის სოციალურ ქსელში წერს.

"ვინ არიან ის ადამიანები ვისაც მეორე ადამიანის სიკვდილი უხარიათ? როგორი საშიში საზოგადოება ვართ თურმე!მოვიქცეთ ისე როგორც ამას ჩვენი ქვეყანა იმსახურებს! გთხოვთ გადაიყვანეთ და დაასრულეთ ეს ემოციების ომი!!!", - წერს კულუმბეგოვი.

შეგახსენებთ, გუშინ, მიხეილ სააკაშვილის ჯანმრთელობის მდგომარეობა დამძიმდა. მესამე პრეზიდენტის ადვოკატმა ბექა ბასილაიამ განაცხადა, რომ ადვოკატებთან შეხვედრის შემდეგ სააკაშვილი მოსხლეტით წაიქცა და საკაცით გაიყვანეს. მოგვიანებით, ექიმ-რეანიმატოლოგ გულიკო ქილიფთარმა განაცხადა, რომ მიხეილ სააკაშვილი რეანიმაციულ განყოფილებაში იმყოფება და მისი მდგომარეობა სტაბილურია.

მიხეილ სააკაშვილი თბილისში 1-ელ ოქტომბერს დააკავეს. პატიმრობის პირველივე დღიდან მან შიმშილობა გამოაცხადა. თვეზე მეტი ხნის განმავლობაში სააკაშვილი რუსთავის მე-12 პენიტენციურ დაწესებულებაში იმყოფებოდა.

8 ნოემბერს სააკაშვილი გადაიყვანეს გლდანის ციხის ტერიტორიაზე მდებარე, მე-18 სამკურნალო დაწესებულებაში. 11 ნოემბერს მიხეილ სააკაშვილმა განაცხადა, რომ მზად არის, შიმშილობა შეწყვიტოს, თუ გადაიყვანენ სამოქალაქო კლინიკაში. ამასთან, მისივე თქმით, ეს არ უნდა იყოს გორის ჰოსპიტალი.