საგარეო საქმეთა მინისტრის პირველი მოადგილე გიგა ბოკერია ნატოს საპარლამენტო ასამბლეის მიერ საქართველოს საკითხზე მიღებულ რეზოლუციას "ქართული დიპლომატიის კიდევ ერთ გამარჯვებად" აფასებს.
"ის, რომ ლისაბონის სამიტის წინ, ნატოს საპარლამენტო ასამბლეამ მიიღო ასეთი მკაფიო და არაორაზროვანი რეზოლუცია - საქართველოს მხარდამჭერი ყველა საკვანძო საკითხში, როგორც რუსულ ოკუპაციასთან, ისე ეთნიკურ წმენდასთან ძალიან მკაფიო გზავნილით, არის ჩვენთვის სწორედ ის პოლიტიკური ფონი, რომელიც საქართველოს სჭირდება", - განუცხადა ბოკერიამ აღნიშნულ საკითხზე კომენტირებისას ჟურნალისტებს.
შეგახსენებთ, რომ გუშინ, ვარშავაში გამართულ ბოლო საშემოდგომო სესიაზე ნატოს საპარლამენტო ასამბლეამ საქართველოს საკითხზე მორიგი რეზოლუცია მიიღო.
რეზოლუციაში, რომლის სახელწოდებაა "სიტუაცია საქართველოში",
აფხაზეთი და ე.წ. სამხრეთ ოსეთი ოკუპირებულ ტერიტორიებად არის მოხსენიებული. ქართული მხარის მოლოდინის შესაბამისად, დოკუმენტში ყოველგავრი განმარტებების გარეშე ჩაიწერა ტერმინები "ოკუპაცია" და "ეთნიკური წმენდა".
გარდა ამისა, რეზოლუციაში ნატოს საპარლამენტო ასამბლეა მკაცრად აკრიტიკებს საქართველოს ოკუპირებულ ტერიტორიებთან მიმართებაში რუსეთის ქმედებებს და მისგან, როგორც ნაკისრი ვალდებულებების შესრულებას მოითხოვს, ისე დაჟინებით მოუწოდებს, იძულებით გადაადგილებულ პირთა უსაფრთხო დაუბრუნებას ხელი არ შეუშალოს.
ამასთან, ასამბლეა "მიესალმება საქართველოში მიმდინარე დემოკრატიულ რეფორმებსაც" და აღნიშნულ კონტექსტში დოკუმენტში პირდაპირ ჩაიწერა, რომ "საქართველო აუცილებლად გახდება ნატოს წევრი, რასაც ალიანსში შემავალი ყველა ქვეყანა მხარს უჭერს".
აღსანიშნავია, რომ რეზოლუციის ტექსტის აღნიშნული ფორმით მიღებას რუსეთის დელეგაცია კატეგორიულად ეწინააღმდეგებოდა.
