საქართველოს პრეზიდენტმა მიხეილ სააკაშვილმა ქუთაისში მთავრობის სახლის მშენებლობა გახსნა.
როგორც მან ქუთაისის ოპერის თეატრის წინ ადგილობრივ მოსახლეობასთან შეხვედრისას თქვა, მთავრობის სახლი ერთი წლის შემდეგ გაიხსნება.
"დღეს, ქუთაისში გავხსენი ახალი მთავრობის სახლის მშენებლობა. თქვენ გეგონათ რომ აქ მარტო პარლამენტი გადმოდიოდა, მაგრამ ნელ-ნელა ვიპარებით ქუთაისში, ჯერ პარლამენტი შემოგაპარეთ ახლა მთავრობა და ასე თანდათან ვახორციელებთ ქუთაისის მეორე დედაქალაქად ქცევის პროექტს. ეს მნიშვნელოვანი დღეა. მთავრობის ეს სახლი გაიხსენება ერთი წლის თავზე. პარლამენტს დასჭირდება კიდევ წელიწადნახევარი, რის შემდეგაც მსოფლიოში ალბათ ყველაზე ლამაზი პარლამენტის შენობა გვექნება", - განაცხადა სააკაშვილმა.
სააკაშვილის განმარტებით, ქუთაისი იმიტომ შეირჩა, რომ ეს არის ყველაზე დიდი, ქალაქი რომელიც საქართველოს ცენტრთან გადის.
"იმის გათვალისწინებით რომ განვითარება ხდება ზღვისკენ, იმის გათვალისწინებით რომ გველეშაპს კლანჭი აქვს ჩავლებული ჩვენს ყველაზე მნიშვნელოვან ტერიტორიაზე და ქართლის ნაწილშიც თავზე დაგვყურებს თავისი სამხედროებით, იმის გათვალისწინებით, რომ თბილისს სჭირდება განტვირთვა, ამ რეგიონს სჭირდება განვითარება", აღნიშნავს საქართველოს პრეზიდენტი.
მისი განმარტებით, ამ გადაწყვეტილების მომხრე და ერთ-ერთი ინიციატორი თბილისის მერი იყო.
