მიხეილ სააკაშვილის მიმართ 7 ნოემბრის საქმეზე აღკვეთის ღონისძიების გაუქმება ფაქტობრივ მოცემულობას არ ცვლის, ამის შესახებ ჟურნალისტებს პროკურორმა ჯარჯი წიკლაურმა განუცხადა.
„7 ნოემბრის საქმეზე ბრალდებულ მიხეილ სააკაშვილის მიმართ გამოყენებული აღკვეთის ღონისძიება გაუქმდა. სასამართლომ ჩათვალა, რომ აღარ იყო პატიმრობის გამოყენების საჭიროება და გააუქმა აღკვეთის ღონისძიება. აქვე განვმარტავთ, რომ მიხეილ სააკაშვილი ამავე დროს მსჯავრდებულია სანდრო გირგვლიანისა და ვალერი გელაშვილი საქმეებზე სამივე ინსტანციის სასამართლოს მხრიდან. შესაბამისად, მას მისჯილი აქვს თავისუფლების აღკვეთა 6 წლის ვადით და 7 ნოემბრის საქმეზე პატიმრობის გაუქმება არ ცვლის ფაქტობრივ მოცემულობას, რადგან იმ საქმეებზე, რაზეც მიხეილ სააკაშვილი მსჯავრდებულია, ის გააგრძელებს სასჯელის მოხდას შესაბამის პენიტენციურ დაწესებულებაში“, - განაცხადა წიკლაურმა.
თბილისის საქალაქო სასამართლოში დღეს გამართულ სასამართლო პროცესს მიხეილ სააკაშვილი არ ესწრებოდა. როგორც პენიტენციურ სამსახურში აღნიშნეს, შესაძლო დესტრუქციული ქმედებებისა და ჯანმრთელობის დამატებითი რისკის გამო, სამსახური მოკლებულია შესაძლებლობას, გადაიყვანოს სააკაშვილი სასამართლოში.
„ტელეიმედის“, 7 ნოემბრის დარბევისა და პატარკაციშვილების ქონების დაუფლების საქმეზე ბრალდებულთა შორისაა ექსპრეზიდენტი მიხეილ სააკაშვილი და კიდევ 5 ყოფილი მაღალჩინოსანი. მიხეილ სააკაშვილს, ზურაბ ადეიშვილსა და დავით კეზერაშვილს „იმედში“ შეჭრისა და 7 ნოემბრის აქციის დარბევის საქმეზე 2014 წლის 1-ელ აგვისტოს, აღკვეთის ღონისძიების სახით პატიმრობა შეეფარდათ.
