ამ სახელმწიფოს დასამარება იქნება, თუ რამე დაემართება მიხეილ სააკაშვილს, - ამის შესახებ "ნაციონალური მოძრაობის" ფოთის ორგანიზაციის ხელმძღვანელმა, დარეჯან ცხვიტარიამ განაცხადა, რომელიც თბილისის საქალაქო სასამართლოსთან იმყოფება.
მისი განცხადებით, ხელისუფლებამ დაუყოვნებლივ უნდა გადაიყვანოს მიხეილ სააკაშვილი კლინიკაში, რადგან მის სიცოცხლეს საფრთხე ემუქრება.
"თავისუფლება მიხეილ სააკაშვილს. უდანაშაულოს, პოლიტიკოსების მსხვერპლი რომ გახდა ჩემი აღმშენებელი, ახალი სახელმწიფოს აღმშენებელი, თანამედროვე სახელმწიფოს აღმშენებელი პრეზიდენტი, თავისუფლება მიხეილ სააკაშვილს. ელემენტარულ რაღაცას ითხოვს ხალხი, გადაიყვანონ საავადმყოფოში, რომ მის სიცოცხლეს საფრთხე ემუქრება, ბოლოს და ბოლოს მიხვდნენ, რომ ეს ქვეყანას აზიანებს, მარტო მიხეილ სააკაშვილს და ჩვენ კი არა. ამ სახელმწიფოს დასამარება იქნება, თუ რამე დაემართება მიხეილ სააკაშვილს", - თქვა ცხვიტარიამ.
შეგახსენებთ, თბილისის საქალაქო სასამართლოში მიხეილ სააკაშვილის პროცესი გაიმართება. დღევანდელ სასამართლო სხდომაზე ადვოკატები აპირებენ დააყენონ შუამდგომლობა სააკაშვილის აღკვეთი ღონისძიების მოხსნის შესახებ და მას მიეცეს ტელეფონით სარგებლობის უფლება.
როგორც ცნობილია, სასამართლო პროცესს, მისი სურვილის მიუხედავად, მიხეილ სააკაშვილი არ დაესწრება. აღნიშნული გადაწყვეტილება სპეციალურმა პენიტენციურმა სამსახურმა მიიღო.
