საქართველოში აშშ-ის ელჩის, კელი დეგნანის რეზიდენციაში არასამთავრობო ორგანიზაციებისა და სახალხო დამცველის წარმომადგენლები ევროპისა და ევრაზიის საკითხებში სახელმწიფო მდივნის თანაშემწის მოადგილეს ერიკა ოლსონს შეხვდნენ.
შეხვედრას ესწრებოდნენ:"საერთაშორისო გამჭვირვალობა - საქართველოს", "საქართველოს ახალგაზრდა იურისტთა ასოციაციის", "სოციალური სამართლიანობის ცენტრისა" და სახალხო დამცველის მოადგილე გიორგი ბურჯანაძე.
როგორც არასამთავრობო ორგანიზაციების წარმომადგენლებმა, შეხვედრის დასრულების შემდეგ განაცხადეს, ერიკა ოლსონთან საუბარი ძირითადად მართლმსაჯულების სფეროში არსებულ პრობლემებს და სასამართლო კლანს შეეხებოდა.
"საერთაშორისო გამჭვირვალობე - საქართველოს" აღმასრულებელი დირექტორის ეკა გიგაურის განცხადებით, მათი ერთ-ერთი რეკომენდაცია კონკრეტული მოსამართლეების სანქცირება იყო.
"ჩვენი ერთ-ერთი რეკომენდაცია იყო, ზუსტად ის, რომ შესაძლოა, იყოს მნიშვნელოვანი, რომ ტარგეტირებული სანქციები იქნეს გამოყენებული ჩვენი პარტნიორების მხრიდან კონკრეტული მოსამართლეების მისამართით. ასევე ვსაუბრობდით, რომ მნიშვნელოვანია მხარი დავუჭიროთ იმ მოსამართლეებს, რომლებიც ეწინააღმდეგებიან კლანის ქმედებებს სასამართლო სისტემაში", - თქვა გიგაურმა.
ამასთან, გიგაურმა აღნიშნა, რომ დასავლელი პარტნიორების მხრიდან სასამართლოს სისტემაში არსებული გამოწვეევების მიმართ, ბოლო დროს განცხადებები გამკაცრდა, თუმცა საჭიროა კიდევ უფრო მკაცრი ნაბიჯები.
"ჩემი რეკომენდაცია იყო, რომ პარტნიორების მხრიდან კიდევ უფრო მკაცრი ნაბიჯებია საჭირო იმისათვის, რომ სასამართლო სისტემა გაიმართოს", - დასძინა ეკა გიგაურმა.
აშშ-ის სახელმწიფო მდივნის თანაშემწის მოადგილე საქართველოში ვიზიტის ფარგლებში მანამდე ხელისუფლებისა და ოპოზიციის წარმომადგენლებს შეხვდა.