მიხეილ სააკაშვილი ფაქტობრივად, პოლიტიკური მძევლობიდან უკვე გადაიქცა „ქართული ოცნების“ პრორუსული ხელისუფლების მხრიდან შურისძიების სუბიექტად, - აცხადებს საქართველოს მესამე პრეზიდენტის ერთ-ერთი ადვოკატი ბექა ბასილაია.
მისი თქმით, ხელისუფლებამ კრიმინალი ჩაიდინა.
"მთავარი არის ის, რომ მიხეილ სააკაშვილი არის გატაცებული. საკუთარი ნების საწინააღმდეგოდ პატიმრობაში მყოფი ადამიანი მოიტაცეს ერთი ადგილიდან და გადმოიყვანეს მეორე ადგილზე. კრიმინალი ჩაიდინა ხელისუფლებამ. ჩვენ დღეს უნდა შეგვიშვან, არანაირი საფუძველი არ აქვთ ჩვენი არშეშვების. მიხეილ სააკაშვილი ფაქტობრივად, პოლიტიკური მძევლობიდან უკვე გადაიქცა „ქართული ოცნების“ პრორუსული ხელისუფლების მხრიდან შურისძიების სუბიექტად. მათ არ აკმარეს მიხეილ სააკაშვილს ის კანონდარღვევები, რაც მთელი ამ თვენახევრის მანძილზე ხდებოდა, გაიტაცეს და მოათავსეს იქ, სადაც მის მიმართ ფსიქოლოგიური ტერორი ხორციელდება, სადაც ადგილი აქვს არაადამიანურ მოპყრობას. ეს ყველაფერი უნდა დასრულდეს, თუმცა სასამართლო და სამართალდამცავი სისტემა მოშლილია. მინდა მივმართო თითოეულ პოლიციელს, საბადრაგო სამსახურის თანამშრომელს, „ქართული ოცნების“ თითოეულ თანამშრომელს, ვის მოსწონს მესამე პრეზიდენტის მიმართ ის, რაც გუშინ განხორციელდა, რომელ ჭკუათმყოფელ ადამიანს, რომელ პატიოსან მოქალაქეს შეიძლება მოსწონდეს მისი მესამე პრეზიდენტის მიმართ რაც გუშინ განხორციელდა?“ - განაცხადა ბასილაიამ.
