ცხინვალის ე.წ. სასამართლომ ე. წ. სამხრეთ ოსეთის დროებითი ადმინისტრაციის წევრს ტაიმურაზ ჯერაპოვს 13 წლით თავისუფლების აღკვეთა მიუსაჯა.
"ცხინვალში პროქართული მარიონეტული "სამხრეთ ოსეთის ალტერნატიული მთავრობის" წევრის ტაიმურაზ ჯერაპოვის სასამართლო პროცესი დასრულდა", _ იუწყება ე. წ. სამხრეთ ოსეთის ბეჭდვისა და ინფორმაციის კომიტეტი.
მათი ინფორმაციით, ტაიმურაზ ჯერაპოვს ბრალდებად წაყენებული ჰქონდა "საკონსტიტუციო წყობის დარღვევა, ხელისუფლების ძალადობრივი გზით ხელში ჩაგდება".
"სამხრეთ ოსეთის კონსტიტუციის დარღვევით ტაიმურაზ ჯერაპოვმა თავისი თავი "ალტერნატიული მთავრობის" არჩევნებზე პრეზიდენტის პოსტზე წამოაყენა. პარალელურად, სამხრეთ ოსეთის ტერიტორიაზე საპრეზიდენტო არჩევნები მიმდინარეობდა. ამის შემდეგ მან "ალტერნატიულ მთავრობაში" ეკონომიკის მინისტრის თანამდებობა დაიკავა", _ იუწყება კომიტეტი.
მათი ინფორმაციით, "ცხინვალის სასამართლომ ბრალდებული დამნაშავედ ცნო და 13 წლით თავისუფლების აღკვეთა მიუსაჯა, მკაცრი რეჟიმის დაწესებულებაში სასჯელის მოხდით".
