მოსამართლეთა კონფერენციის მიერ საქართველოს იუსტიციის უმაღლესი საბჭოს ორი წევრის არჩევასთან დაკავშირებით, ევროკავშირისა და ამერიკის საელჩოს კრიტიკულ შეფასებებს, მოსამართლეთა კონფერენციის ადმინისტრაციული კომიტეტი სპეციალური განცხადებით ეხმიანება.
ადმინისტრაციული კომიტეტის განცხადებით, უმაღლესი საბჭოს მოსამართლე წევრების არჩევასთან დაკავშირებულ შეფასებები აშკარად გადაჭარბებული, დაუსაბუთებელი და წინააღმდეგობრივია.
ამასთან, კომიტეტი დიპლომატებს ვენის კონვენციის მნიშვნელობაზე მიანიშნებს და აცხადებს, რომ ყველა დიპლომატი ვალდებულია, არ ჩაერიოს ქვეყნის საშინაო საქმეებში.
"ყველა სუბიექტს შევახსენებთ, რომ საქართველო დამოუკიდებელი სახელმწიფოა, რომლის სასამართლო ხელისუფლებაც ასევე დამოუკიდებლად, გარეშე ჩარევის გარეშე საქმიანობს და ემორჩილება მხოლოდ კანონს. საქართველოში აკრედიტებული დიპლომატიური წარმომადგენლობის ყველა თანამშრომელი, ხელმძღვანელების ჩათვლით, დიპლომატიური ურთიერთობის შესახებ ვენის კონვენციის 41-ე მუხლის თანახმად, ვალდებულია - პატივი სცეს ადგილსამყოფელი სახელმწიფოს კანონებსა და დადგენილებებს, არ ჩაერიოს მის საშინაო საქმეებში", - ვკითხულობთ განცხადებაში.
კომიტეტის მტკიცებით, საქართველოს სასამართლო ხელისუფლება ყოველთვის განუხრელად იცავს პოლიტიკურ ნეიტრალიტეტს და მის კომპეტენციას მიკუთვნებულ საკითხებს წყვეტს მხოლოდ კანონის საფუძველზე.
"ყველამ, მათ შორის ნებისმიერმა თანამდებობის პირმა თუ ორგანიზაციამ კარგად უნდა გააცნობიეროს, რომ მოსამართლეთა კონფერენციის აღნიშნული გადაწყვეტილება არც ,,გაუგებარი“ და არც ,,უკან გადადგმული მე-5 ნაბიჯია“, არამედ - ის არის სწორედ სასამართლო ხელისუფლების დამოუკიდებლობის გამოხატულება, ხელისუფლების დანაწილების პრინციპის რეალიზება. კონფერენცია ჩატარდა კანონის სრული დაცვით და თუ ვინმესთვის მიუღებელია მისი შედეგები, ამის გამო მთელი პროცესისთვის ჩრდილის მიყენება ცალსახად უმართებულოა. რაც მთავარია, ეს გადაწყვეტილება ვერანაირად დააზიანებს საქართველოს ევროინტეგრაციის პროცესს, რადგან სწორედ სასამართლო ხელისუფლების საქმიანობაში ჩაურევლობა და მისი დამოუკიდებელი საქმიანობა არის დასავლური მართლწესრიგის უმთავრესი ქვაკუთხედი, რომლის გარეშეც არ არსებობს დემოკრატია და სამართლებრივი სახელმწიფო", - ნათქვამია განცხადებაში.
მოსამართლეთა კონფერენციის ადმინისტრაციული კომიტეტი ირწმუნება, რომ იუსტიციის უმაღლესი საბჭოს არამოსამართლე წევრების შესარჩევად არჩევნები ჩატარდა სრულად თავისუფალ და კონკურენტუნარიან გარემოში.
"განხილული შეფასებები ტოვებს განცდას, რომ გარკვეული სუბიექტები ვერ შეურიგდნენ კონფერენციაზე მიღებულ საკადრო გადაწყვეტილებებს და ამის გამო ხდება სასამართლო სისტემაზე თავდასხმა", - აღნიშნულია განცხადებაში.
იუსტიციის უმაღლესი საბჭოს ორი წევრის არჩევას თავდაპირველად საქართველოში ევროკავშირის ელჩი, კარლ ჰარცელი კრიტიკული განცხადებით გამოეხმაურა. ელჩი ჰარცელის შეფასებით, საქართველოში სასამართლო სისტემისა და კანონის უზენაესობის სფეროში ეს რიგით მეხუთე უკან გადადგმული ნაბიჯია ბოლო ოთხი თვის განმავლობაში.
კრიტიკული იყო საქართველოში შეერთებული შტატების საელჩოს განცხადებაც, სადაც აღნიშნულია, რომ სასამართლო სისტემამ კვლავ ვერ შეძლო თავისი წევრების არჩევა კონკურენტული და დემოკრატიული საარჩევნო პროცესის მეშვეობით.
საელჩოს განცხადებით, როდესაც მოსამართლეთა კონფერენცია ნაჩქარევად იღებს მნიშვნელოვან გადაწყვეტილებებს კონკურსისა და გამჭვირვალობის გარეშე, იგი წარმოაჩენს, რომ არ სურს რეფორმების განხორციელება, რომელმაც უნდა გაზარდოს გამჭვირვალობა, ანგარიშვალდებულება და საზოგადოების ნდობა დანიშვნების პროცესის, კანდიდატებისა და იუსტიციის უმაღლესი საბჭოს მიმართ.
საბჭოს წევრების არჩევას გაუგებარი უწოდა საქართველოს პრეზიდენტმა სალომე ზურაბიშვილმა.
შეგახსენებთ, 31 ოქტომბერს იუსტიციის უმაღლესმა საბჭომ ორი ახალი მოსამართლე წევრი, პაატა სილაგაძე და გიორგი გოგინაშვილი აირჩია. საბჭოს ახალი წევრები მოსამართლეთა XXX კონფერენციაზე აირჩიეს.
ახალი წევრების არჩევის საკითხი დღის წესრიგში მას შემდეგ დადგა, რაც იუსტიციის უმაღლეს საბჭოში თანამდებობა ვადაზე ადრე დატოვეს თამარ ონიანმა და თეა ლეონიძემ.
