ჯანდაცვის ექსპერტი დევი ტაბიძე საქართველოში არსებულ ეპიდემიოლოგიურ ვითარებას საგანგაშოდ მიიჩნევს. დევი ტაბიძის კომენტარს "საზოგადოებრივი მაუწყებელი" ავრცელებს.
მისი განცხადებით, გარდა იმისა, რომ კორონავირუსული ინფექციების შემთხვევები მაღალია, მას თან ერთვის სეზონური გრიპის ვირუსები, რომელიც უკვე შეერია და მოხდა გადაკვეთა კოვიდ-19-თან.
"მდგომარეობა ძალიან რთულია. ამ ვირუსთან თამაში და ხუმრობა ნამდვილად არ შეიძლება, რადგან ყოველმხრივ არაორდინალური ვირუსია, როდის, რას გამოავლენს და რომელ ახალ შტამს წამოიღებს, არავინ იცის. გარდა ამისა, არსებობს მოცემულობა, რასაც ჰქვია სეზონური გრიპის ვირუსები, რომელიც უკვე შეერია, ასე ვთქვათ, მოხდა მათი გადაკვეთა. ამ ფორმით კიდევ მოიმატებს და გაიზრდება რაოდენობა. ჩემი აზრით, თუ ყველაფერი ასე გაგრძელდა და არ ვიქნებით ორგანიზებულად, შესაძლებელია, სულ მცირე 7 000 შემთხვევას გადავცდეთ, ეს არის ძალიან მძიმე ციფრი, მაგრამ რეალობაა", - განაცხადა დევი ტაბიძემ.
ჯანდაცვის ექსპერტის განცხადებით, დღეს, მოსახლეობას კორონა გენოციდი ემუქრება.
"მომართვიანობა [ვაქცინაციის] ძალიან დაბალია, ჩემი პირადი მოსაზრებით, შეიძლება ითქვას, ამას დავარქვა ნულოვანი ზღვარი, რადგან რაოდენობა, რომელიც არის, არანაირ შედეგს არ გამოიღებს, სრულ აცდენაშია ვაქცინაციის იმ გეგმასთან, რომელიც გამოაქვეყნა საკოორდინაციო და ვაქცინაციის საბჭომ. ამას ყველა ადასტურებს. რაოდენობრივად რომ წავიკითხავთ ციფრს, ვითომ თვალში ხვდება, რომ მაღალია, მაგრამ იქ არის ორჯერადი, ერთჯერადი აცრა. ასევე არის რაოდენობა ადამიანების, რომლებიც ბუსტერთან დაკავშირებით გამოთქვამენ სურვილს. თუ ვაქცინაცია არ ჩატარდა და არ მოხდა დაგეგმილი რეგულაციების კონტროლი, ჩვენ ვერ მივიღებთ შედეგს. დღეს მოსახლეობას ემუქრება კორონავირუსისგან გენოციდი, კორონა გენოციდი, ეს მე ვახსენე ზუსტად ერთი წლის წინ და დღეს კიდევ ეს ყველაფერი გამოვლინდა. სამწუხაროდ, იმის მაგივრად, რომ ორი წლის თავზე შეცვლილიყო ვითარება, ისევ გენოციდის წინაშე დავდექით", – განაცხადა ტაბიძემ.
