ყველა მცდელობა წარმოაჩინონ მე-18 დაწესებულება ადეკვატურად მიხეილ სააკაშვილისთვის მკურნალობის გასაწევად, არის მტკნარი სიცრუე, აცხადებს საქართველოს მესამე პრეზიდენტის ერთ-ერთი ადვოკატი დიმიტრი საძაგლიშვილი.
მისი თქმით, სახალხო დამცველის მხრიდან უკვე შეფასდა, რომ დაწესებულება არ შეესაბამებოდა გარკვეულ კრიტერიუმებს.
„ჩვენ უკვე ვნახეთ ასეთი შემოწმება მიუკერძოებელი სუბიექტის, სახალხო დამცველის მხრიდან, რომელმაც გაგზავნა ექსპერტები და დადო შეფასება, რომ არ შეესაბამებოდა იმ კრიტერიუმებს, რომელიც განსაზღვრა კონსილიუმმა. ამის შემდეგ, ყველა მცდელობა წარმოაჩინონ მე-18 დაწესებულება ადეკვატურად მიხეილ სააკაშვილისთვის მკურნალობის გასაწევად, არის მტკნარი სიცრუე. რეანიმატოლოგი არ იყო და სახალხო დამცველის ვიზიტის შემდეგ დანიშნეს. ცდილობენ გამოასწორონ შეფასებები და ალბათ, ახალი საავადმყოფოს აშენებას ვერ ასწრებენ ფიზიკურად გლდანის ციხის ტერიტორიაზე და ამიტომ არის ამ დრომდე ასეთი განცხადებები გაკეთებული, თორემ ააშენებდნენ ახალ ჰოსპიტალსაც”, - აღნიშნა დიმიტრი საძაგლიშვილმა.