ი. ციციშვილის სახელობის ბავშვთა კლინიკას „მწვანე ჰოსპიტლის“ სტატუსი მიენიჭა, რაც იმას ნიშნავს, რომ სამედიცინო ცენტრში დასაქმებული პერსონალის 80%-ზე მეტი უკვე ვაქცინირებულია. უფრო კონკრეტულად, კლინიკაში კოვიდ 19-ის საწინააღმდეგო ვაქცინის ერთი დოზით თანამშრომელთა 87%, ხოლო ორი დოზით - 82%-ია აცრილი.
ვაქცინაციის მხარდაჭერისა და მაქსიმალურად უსაფრთხო გარემოს შექმნის მიზნით, ევექსი ჰოსპიტლებმა ქსელში შემავალ სამედიცინო ცენტრებს შორის ერთგვარი გამოწვევა წამოიწყო, რომელიც "მწვანე ჰოსპიტლის" სტატუსის მინიჭებას გულისხმობს იმ ცენტრისთვის, რომლის თანამშრომელთა მინიმუმ 80%-ია ვაქცინირებული.
კამპანიაში ჩართულ სამედიცინო ცენტრებში ვაქცინაციის პროცესი აქტიურ რეჟიმში მიმდინარეობს. 80%-იანი ზღვარი უკვე გადალახეს ფოთის ჰოსპიტალმა (96%) და მ. იაშვილის სახელობის ბათუმის დედათა და ბავშვთა ცენტრალურმა ჰოსპიტალმა (83%). აღნიშნულ სამედიცინო დაწესებულებებს „მწვანე ჰოსპიტლის” სტატუსი უკვე მიენიჭა.
ასევე, მუდმივად ახლდება პროცენტული მაჩვენებლების ყოველკვირეული მონაცემებიც.
მიმდინარე კვირას 70%-იანი ზღვარი უკვე გადალახეს შემდეგმა ჰოსპიტალებმა. ესენია:
O მ. იაშვილის სახელობის ბავშვთა ცენტრალური საავადმყოფო
O ბათუმის რეფერალური ჰოსპიტალი
O დასავლეთ საქართველოს სამედიცინო ცენტრი
O ტრავმატოლოგიური ჰოსპიტალი
აღსანიშნავია, რომ ი. ციციშვილის სახელობის ბავშვთა კლინიკამ პირველი ინფიცირებული პაციენტი 2020 წლის ოქტომბერში მიიღო. 175 საწოლზე გაშლილი სამედიცინო დაწესებულება ერთ-ერთი ყველაზე დიდი, მძლავრი და მრავალპროფილური პედიატრიული კოვიდ-ცენტრია, სადაც ქვეყნის მასშტაბით მძიმე პედიატრიული სეგმენტის რეფერირება ხორციელდება. ბავშვთა კლინიკამ გასული წლიდან დღემდე სულ 4 000-ზე მეტი კოვიდ-ინფიცირებული პაციენტი გაატარა.