თუ ვინმე ეჭვობდა, რომ თბილისის მერის არჩევნებში ოპოზიცია გაიმარჯვებს, დღევანდელი დღის შემდეგ ეჭვი ალბათ აღარავის ეპარება - ასე ეხმიანება დეპუტატი სალომე სამადაშვილი, ნიკა მელიას მიერ ჩრდილოვანი კაბინეტის წარდგენას. ამის შესახებ სამადაშვილმა "რუსთავი 2"-ის ეთერში ისაუბრა.
სალომე სამადაშვილის თქმით, დღეს არის გარდამტეხი მომენტი, რადგან ოპოზიციურმა პარტიებმა უპრეცენდენტო ერთობა აჩვენეს.
"ვფიქრობ, ეს არის გარდამტეხი მომენტი ჩვენი ქვეყნის თანამედროვე პოლიტიკაში. იმიტომ, რომ თუ ვინმეს ჰქონდა რაიმე ეჭვი, თბილისის მერის არჩევნებში ოპოზიცია გაიმარჯვებს, მე ვფიქრობ, რომ დღევანდელი დღის შემდეგ ეჭვი ალბათ არავის აღარ ეპარება. იმიტომ, რომ ის ერთიანობა, რაც შედგა ოპოზიციის მხრიდან და ეს არის ძალიან მნიშვნელოვანი ერთიანობა, იმიტომ, რომ ეს არ არის ერთიანობა რომელიმე კანდიდატის გარშემო.
გასაგებია, რომ "ნაციონალური მოძრაობის" თავმჯდომარე არის თბილისის მერობის კანდიდატი, მაგრამ წარდგენილი იქნა სრული შემადგენლობა, სრულად დაკომპლექტებული მომავალი მთავრობა მუნიციპალიტეტის დონეზე. მე ვფიქრობ, რომ ეს არის უკიდურესად მნიშვნელოვანი და დიდი სურვილი მქონდა, წინა საპარალამენტო არჩევნებზე რომ იგივე გაკეთებულიყო სწორედ მთავრობის შემადგენლობასთან დაკავშირებით, რომ კოალიციური ხედვა წარდგენილიყო, მაგრამ მაშინ არ იყო ამის პოლიტიკური მზაობა პარტიებს შორის. დღეს ეს არის გარდამტეხი მომენტი, იმიტომ რომ ყველა ადამიანმა, რომელსაც სურს ცვლილება ქვეყანაში და ასეთია ამომრჩევლის უმრავლესობა, ვფიქრობ, რომ დაინახა საკუთარი არჩევანი," - ამბობს სალომე სამადაშვილი.