რადგანაც ბავშვებს ვერ ვცრით, თუ არ იქნებიან მშობლები, ბებიები, ბაბუები, ძიძები აცრილები, სხვანაირად ჩვენ ბავშვებს უბრალოდ ვერ დავიცავთ კორონავირუსისგან, - განაცხადა"დღის კურიერში" ციციშვილის სახელობის ბავშვთა ახალი კლინიკის სამედიცინო დირექტორმა მაია ჩხაიძემ.
მისი თქმით, ძირითადად, ახალშობილებში ხდება დამძიმება იმის გამო, რომ მათი იმუნური სისტემა უმწიფარია.
„მშობლებისთვის ამომავალი წერტილი უნდა იყოს ის, რომ ბავშვების ვაქცინაცია არ ხდება. რადგანაც ბავშვებს ვერ ვცრით, თუ არ იქნებიან მშობლები, ბებიები, ბაბუები, ძიძები აცრილები, სხვანაირად ჩვენ ბავშვებს უბრალოდ ვერ დავიცავთ კორონავირუსისგან.
მოგეხსენებათ, რომ ოპტიმალური ვარიანტი აირჩია ჩვენმა ქვეყანამ, 12 წლის ზემოთ ბავშვების ვაქცინაცია, მხოლოდ რისკ-ჯგუფების და ეს ნამდვილად გასაკეთებელი იყო. ჩემი კლინიკის მაგალითზე შემიძლია ვთქვა, რომ როგორც მოზრდილებში, ისე ბავშვებში კორონავირუსული ინფექცია განსაკუთრებით მძიმედ მიდის თუ არის რისკ-ჯგუფის პაციენტი, ანუ თუ მას აქვს ასეთი თანმხლები დაავადებები და ასეთი თანმხლები დაავადებების ძალიან გრძელი ნუსხა აქვთ ხოლმე პაციენტებს, ბავშვებს, რომელიც ჩვენთან ხვდებიან რეანიმაციაში. ეს არის - ენდოკრინული დაავადებები, გულის მანკები, გენეტიკური დაავადებები და სხვადასხვა, რომელთა ფონზეც კორონავირუსი მძიმედ მიდის.
ძირითადად, ახალშობილებში ხდება დამძიმება იმის გამო, რომ მათი იმუნური სისტემა უმწიფარია და ზოგადად, ყველა ინფექცია ძალიან რთულად გადააქვთ ახალშობილებს, ყველა ორგანოს ჩამოყალიბება სრულად არ არის დამდგარი. კორონავირუსი კი განსაკუთრებით ფილტვის ქსოვილს, სისხლძარღვებს აზიანებს”, - განაცხადა მაია ჩხაიძემ "დღის კურიერის" ეთერში.