ეთნოგრაფიულ მუზეუმში მთელი დღის განმავლობაში, აფხაზეთის განათლებისა და კულტურის სამინისტროს ორგანიზებით, კულტურული და საგანმანათლებლო ღონისძიებები ჩატარდება, სადაც აფხაზეთის სიმღერისა და ცეკვის სახელმწიფო ანსამბლი, აფხაზეთის ახალგარზდული კაპელა, ცნობილი ქართველი მომღერლები, აფხაზეთის შემოქმედებითი ჯგუფები და ბავშვთა ანსამბლები მიიღებენ მონაწილეობას. 11:00 საათზე აფხაზეთის მხატვრების ნამუშევრების, მოზარდების ხელნაკეთი ნივთების, ასევე წიგნების გამოფენა მოეწყობა.
12:00 საათზე შ. რუსთაველის სახელმწიფო დრამატული თეატრის მცირე დარბაზში, ჩრდილების სახელმწიფო თეატრი სპექტაკლს „აფხაზეთი - წელიწადის ოთხი დრო" წარმოადგენს. 13:00 საათზე კი მუზეუმის ამფითეატრში, აფხაზეთის მოზარდ მაყურებელთა თეატრი სპექტაკლის „გამარჯობა სოხუმო" ჩვენებას გამართავს.
14:00 საათზე, ეთნოგრაფიულ მუზეუმში ქართულ-აფხაზური ტრადიციული ქორწილი გაიმართება.
სახალხო ზეიმი „აფხაზეთობა 2010" 16:00 საათზე, გალა კონცერტით დასრულდება.
ღონისძიებაზე დასწრების მსურველებს, კუს ტბის ასახვევიდან ეთნოგრაფიულ მუზეუმამდე, მთელი დღის განმავლობაში უფასო ავტობუსები მოემსახურებიან.
ღონისძიების პარტნიორია საქართველოს ეროვნული მუზეუმი.
აფხაზეთობას საქართველოს პარლამენტისა და აღმასრულებელი ზელისუფლების წარმომადგენლები, დიპლომატიური კორპუსი და სხვადასხვა სფეროს წარმომადგენლები დაესწრებიან.
„აფხაზეთობა" აფხაზეთის მთავრობის ინიციატივით 2009 წლიდან იმართება.