ნიკა მელია უცხოელების ძალით დაპარპაშებს გარეთ და რომელიღაც ფეშენებელურ სასტუმროში ყელყელაობს - ამის შესახებ კულტურის მინისტრმა, თეა წულუკიანმა ტელეკომპანია "იმედის" ეთერში განაცხადა და დასძინა, რომ ალბათ, სწორედ ამან გაუჩინა მიხეილ სააკაშვილს შეწყალების იმედი.
წულუკიანის თქმით, მას არ სჯერა, რომ სალომე ზურაბიშვილი მიხეილ სააკაშვილს შეიწყალებს, რადგან ამით ის ქვეყნის ისტორიაში შავი ასოებით ჩაეწერება.
"ნიკა მელიას ვუსმენდი და ამბობდა, რომ კარგი იქნება ისეთ ქვეყანაში ვცხოვრობდე, სადაც ჩვენ თვითონ ვართ მთავარი და არა უცხოელებიო და ეს ის ნიკა მელიაა, რომელიც უცხოელების ძალით დაპარპაშებს გარეთ და მათ მიერ გადახდილი გირაოს ქვეშ არის და უცხოელების თავდებობით არის, რომ რომელიღაც ფეშენებელურ სასტუმროში ყელყელაობს.შეიძლება ამან მისცა სააკაშვილს იმედი, რომ სალომე ზურაბიშვილი არის პრეზიდენტი, რომელიც კვლავაც არის მზად ამ კალიბრის დამნაშავე შეიწყალოს. მე ქალბატონ სალომეს ვიცნობ ლამის ბავშვობიდან, სტუდენტობის ასაკიდან და მეტნაკლებად მგონია შემიძლია გავთვალო, მის მიერ მისაღები გადაწყვეტილებები და ვფიქრობ, რომ ეს იმ ადამიანების შთამომავალია, რომელიც დაბრუნდა სამშობლოში იმისთვის, რომ საქართველო წინ წაიყვანოს და ის არავითარ შემთხვევაში არ დაუშვებს ამას, ვინც არ უნდა სთხოვოს. მე მჯერა, რომ პრეზიდენტი არ დაუშვებს შავი ასოებით ჩაეწეროს საქართველოს ისტორიაში", - განაცხადა თეა წულუკიანმა.
