სააკაშვილს დახვდება ასი ათასობით ადამიანი, მასზე გაბრაზებული, გამწარებული ადამიანი, - ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებთან საუბრისას განაცხადა.
ღარიბაშვილის თქმით, სააკაშვილის ერთადერთი ამოცანა და მისი მიზანი არის ჩვენი ქვეყნის არეულობა, დესტაბილიზაცია და ქაოსის შემოტანა.
"სააკაშვილი არის მსჯავრდებული, იგი იმსახურებს ციხეს, იმიტომ, რომ მან გამოუსწორებელი შედეგები, ზიანი მოუტანა ჩვენს ქვეყანას, ჩვენს მოსახლეობას. ის მოწოდებები, რომ ხალხი გამოვა და დამიცავს, არის, რა თქმა უნდა, სრული სიცრუე და სიყალბე. რისი თავი აქვს მაგ საცოდავს, 5 000 კაცის მოგროვება ძლივს შეუძლიათ, ისიც პიკის დროს და ჩვენ გვკითხონ, რამდენი ადამიანის, რამდენი მხარდამჭერის მობილიზება შეგვიძლია ჩვენს გუნდს. ზოგადად ვამბობ, რომ სააკაშვილს დახვდება ასი ათასობით ადამიანი, მასზე გაბრაზებული, გამწარებული ადამიანი. ხალხის შეცდომაში შეყვანას აპირებენ და ცდილობენ, რომ რაღაც ერთგვარი არეულობა, დაბნეულობა შემოიტანონ. ძალიან მარტივი პასუხია, სახელმწიფო გასცემს პასუხს. სააკაშვილი, როგორც კი შემოვა ჩვენს მიწაზე, ტერიტორიაზე შემოდგამს ფეხს, იმავე წამს იქნება დაკავებული და შებრძანებული ციხეში. ვინც ხელს შეუშლის ამ პროცესს, ყველა ადამიანი დაისჯება უმკაცრესად, კანონის ფარგლებში", - აღნიშნა პრემიერ-მინისტრმა.
შეგახსენებთ, 27 სექტემბერს მიხეილ სააკაშვილმა განაცხადა, რომ 2 ოქტომბრის საღამოსთვის ავიაბილეთი აიღო.