2021 წლის 14-17 სექტემბერს, გოას შტატში სამუშაო ვიზიტის ფარგლებში, გაიმართა საქართველოს ელჩის, არჩილ ძულიაშვილის შეხვედრები შტატის გუბერნატორთან, სრიდჰარან პილაისთან და შტატის მთავარ მინისტრთან, პრამოდ სავანტთან.
გავრცელებული ინფორმაციით, შეხვედრებისას ხაზი გაესვა გოასა და საქართველოს შორის ღრმა ისტორიული და სულიერი კავშირების არსებობას, გოაში აღმოჩენილი წმ. ქეთევან დედეოფლის წმინდა ნაწილების სახით.
"განხილულ იქნა გოასა და კახეთის რეგიონს შორის დაძმობილების პერსპექტივა, რაც ინდოეთის საგარეო საქმეთა მინისტრის, დოქტორ ს. ჯაიშანკარის მიერ გაჟღერდა საქართველოში ა.წ. ივლისში განხორციელებული ოფიციალური ვიზიტის ფარგლებში.
განხილულ იქნა ასევე ორმხრივი თანამშრომლობის კონკრეტული შესაძლებლობები სხვადასხვა მიმართულებით, კერძოდ, სოფლის მეურნეობის, ტურიზმისა და სავაჭრო-ეკონომიკური კუთხით.
განსაკუთრებული ყურადღება გამახვილდა გოას არქეოლოგიურ მუზეუმში წმ. ქეთევან დედოფლის წმინდა ნაწილების ორიგინალის ნაწილის განსათავსებლად სპეციალური ოთახის გამოყოფის მნიშვნელობაზე, ინდურ მხარეს ეთხოვა მხარდაჭერა ამ კუთხით, ასევე 2022 წლის პირველ ნახევარში, გოაში დაგეგმილი წმ. ქეთევანის სახელობის საკრალური მუსიკის ფესტივალის ჩატარების საკითხში.
შეხვედრებისას ხაზი გაესვა გოაში საქართველოს საპატიო საკონსულოს უახლოეს მომავალში გახსნის მნიშვნელობას, რომელიც დიდ წვლილს შეიტანს ორმხრივი თანამშრომლობის განვითარებისა და კონკრეტული პროექტების განხორციელების საქმეში.
შეხვედრებს ქართული მხრიდან დაესწრნენ საქართველოს საელჩოს უფროსი მრჩეველი, ლაშა ჯაფარიძე და გოას შტატში საქართველოს საპატიო კონსულობის კანდიდატი, აკაშ ტიმბლო", - ნათქვამია გავრცელებულ ინფორმაციაში.