რუსეთში საპარლამენტო არჩევნები დაიწყო, რომელიც 3 დღეს, 17-დან 19 სექტემბრის ჩათვლით გასტანს.
პირველი საარჩევნები უბნები კამჩატკის მხარესა და ჩუკოტკის ავტონომიურ ოლქებში გაიხსნა.
სახელმწიფო დუმის წევრებთან ერთად, რუსეთის მოქალაქეები ქვეყნის ცხრა სუბიექტის გუბერნატორსა და 39 რეგიონული პარლამენტის წევრებსაც აირჩევენ.
საპარლამენტო არჩევნებში 14 პოლიტიკური პარტია მონაწილეობს.
ცოტა ხნით ადრე, რუსეთში მიიღეს კანონი, რომლის თანახმადაც არჩევნებში მონაწილეობა ეკრძალებათ "ექსტრემისტული ორგანიზაციის" წევრებსა და მათთან დაკავშირებულ პირებს. რუსი ოპოზიციონერის ალექსეი ნავალნის ორგანიზაცია ექსტრემისტულ ორგანიზაციადაა გამოცხადებული, შესაბამისად მას და მასთან კავშირში მყოფ ყველა პირს უარი ეთქვა არჩევნებში მონაწილეობაზე.
რუსეთის საარჩევნო სისტემა შერეულია - პროპორციულ-მაჟორიტარული. საკანონმდებლო ორგანოს ქვედა პალატა, სახელმწიფო დუმა 450 წევრისგან შედგება. მათგან ნახევარი, 225 პარტიული სიით აირჩევა, დარჩენილი 225 კი ერთმანდატიანი ოლქებიდან.
აღსანიშნავია, რომ კორონავირუსის პანდემიის საბაბით, რუსეთის ხელისუფლებამ მკვეთრად შეზღუდა საპარლამენტო არჩევნებზე უცხოური საერთაშორისო ორგანიზაციების სადამკვირვებლო მისიების წევრთა რაოდენობა. ცოტა ხნის წინ ცნობილი გახდა, რომ ეუთო/ოდირს მხოლოდ 60 დამკვირვებლის წარგზავნის უფლება მიეცა, რის გამოც ორგანიზაციამ საერთოდ უარი თქვა რუსეთში სადამკვირვებლო მისიის განხორციელებაზე.
გუშინ, ევროპარლამენტმა რეზოლუცია მიიღო რუსეთთან დაკავშირებით, სადაც ნათქვამია, რომ ევროკავშირი მზად უნდა იყოს, რათა უარი თქვას რუსეთის დუმის არჩევნების შედეგების ლეგიტიმურად ცნობაზე.
რუსეთის ტერიტორიაზე 108 მილიონზე მეტი ამომრჩეველია რეგისტრირებული, ხოლო საზღვარგარეთ 2 მილიონზე მეტი.
