მეორედან არა, სახურავიდან გადმოაგდეს. დაამძიმეთ, დაამძიმეთ, უფრო საინტერესოა, - ასე უპასუხა "ქართული ოცნების"თბილისის მერობის კანდიდატმა კახა კალაძემ ჟურნალისტის მიერ დასმულ კითხვას ქარელში მომხდარი ინციდენტის შესახებ, რომლის დროსაც "მთავარი არხის" ოპერატორი დაშავდა.
"არასერიოზულად იქცევით, ბიჭი უკან-უკან მიდიოდა, იღებდა და ეს დაემართა. ჩემი თანდასწრებითაც ძალიან ბევრჯერ ყოფილა შემთხვევა, როდესაც ოპერატორები იღებენ, უკან-უკან მიდიან. მაჩვენეთ კადრი, სადაც ჩანს, რომ გადააგდეს. როდესაც გეუბნებიან, გადით, არ გაძლევთ ინტერვიუს, უნდა მიხვდეთ და გახვიდეთ. უნდა დაიცვათ ადამიანის უფლებები. თქვენ ძალადობთ და ხართ მოძალადეები. მე თუ გეტყვით, რომ არ მსურს, მოგცეთ ინტერვიუ, კეთილი უნდა ინებოთ და გაჩერდეთ. რატომ უნდა იძალადოთ ჩემზე? ძალადობას ამართლებთ თქვენ მთელი ეს წლებია. თქვენ ხართ პირველები, ვინც ქვეყანაში აღვივებს შუღლს, ძალადობას. თუ რაიმე ცუდი არსებობს ამ ქვეყანაზე, ყველაფრის ფუძე და საძირკველი ხართ თქვენ", - აღნიშნა კალაძემ.
შეგახსენებთ, "მთავარი არხის" ინფორმაციით, მათი ოპერატორი ლევან აბლოთია "ქართული ოცნების" ქარელის ოფისის მეორე სართულიდან გადმოაგდეს.
ოპერატორის გადმოგდების შესახებ ინფორმაციას, საგანგებო ბრიფინგზე გამოეხმაურა "ქართული ოცნების" აღმასრულებელი მდივანი მამუკა მდინარაძე. მისი განცხადებით, ოპერატორი უკუსვილით ტოვებდა ტერიტორიას, რა დროსაც მოაჯირს გამოედო და კიბის საფეხურებზე დაეცა.
ამ დროისთვის, ლევან აბლოთიას ჯანმრთელობის მდგომარეობა სტაბილურია, ის საავადმყოფოდან უკვე გაწერეს.
