პარლამენტის წევრი სალომე სამადაშვილი ეხმიანება "მთავარი არხის" ოპერატორი "ქართული ოცნების" ქარელის ოფისიდან გადმოვარდნის ფაქტს.
სამადაშვილის განცხადებით, დამოუკიდებელი ჟურნალისტებისთვის გამოცხადებული ომი გრძელდება.
"დამოუკიდებელი ჟურნალისტებისთვის გამოცხადებული ომი გრძელდება. რაც მეტ სისულელს ჩაიდენენ, მით სწრაფად და მძიმედ დასრულდებიან. სოლიდარობა დაშავებულ ოპერატორს, მთავარ არხს და ქართულ მედიას.
არ გამოგივათ ამ ქვეყნის ბელორუსიზაცია-სხვა ხალხი ვართ, სხვა ისტორიული გამოცდილების, სხვა ქსოვილისგან მოქსოვილი საზოგადოება. არჩევნებზე მიიღებთ პასუხს!", - წერს სამადაშვილი სოციალურ ქსელში.
შეგახსენებთ, "მთავარი არხის" ინფორმაციით, მათი ოპერატორი ლევან აბლოთია "ქართული ოცნების" ქარელის ოფისის მეორე სართულიდან გადმოაგდეს.
ოპერატორის გადმოგდების შესახებ ინფორმაციას, საგანგებო ბრიფინგზე გამოეხმაურა "ქართული ოცნების" აღმასრულებელი მდივანი მამუკა მდინარაძე. მისი განცხადებით, ოპერატორი უკუსვილით ტოვებდა ტერიტორიას, რა დროსაც მოაჯირს გამოედო და კიბის საფეხურებზე დაეცა.
