ოპოზიციამ ვერ მოისვენა და ვერ აიტანა, რომ სახელმწიფოსა და ეკლესიას აქვს ძალიან კარგი ურთიერთობა, - ამის შესახებ საპარლამენტო უმრავლესობის წევრმა გურამ მაჭარაშვილმა "ქრონიკასთან" განაცხადა.
"განსაკუთრებულად გამოჩნდა ბოლო თვეების განმავლობაში და ბუნებრივია ახლა რაღაც ფაბრიკაციას მიმართა და უნდა რომ რაღაცნაირად დააზიანოს ეს ურთიერთობები. თუმცა დარწმუნებული ვარ, რომ ამ მრავალი ასეული წლის ურთიერთობები საერო და სასულიერო ხელისუფლებას შორის ნამდვილად არ დაზიანდება", - აღნიშნა მაჭარაშვილმა.
ინტერნეტში სასულიერო პირებსა და საპატრიარქოს თანამშრომლებზე სავარაუდო წერილობითი და აუდიომასალა გავრცელდა. გავრცელებული ფაილები ცალკეული სასულიერო პირების პირად ცხოვრებას ეხება. ფაილები შეიცავს არასრულწლოვანთა შესახებ ინფორმაციასაც.
პროკურატურამ მედიის მიერ ფარულ ჩანაწერებთან დაკავშირებით გავრცელებულ ინფორმაციაზე გამოძიება დაიწყო.