"ნაციონალური მოძრაობის" თავმჯდომარის ნიკა მელიას განცხადებით, საქართველოს ყველა მოქალაქეს აქვს სურვილი და უფლება იყოს ჩართული პოლიტიკურ პროცესებში. ამის შესახებ მან "მთავარი არხის ეთერში განაცხადა.
ნიკა მელია ასევე გამოეხმაურა მიხეილ სააკაშვილის სურვილს საქართველოში დაბრუნების თაობაზე.
"იმ მნიშვნელოვან ეტაპზე, სადაც ჩვენ ვიმყოფებით, ევროპისა და პუტინის რუსეთის გზაგასაყარზე, საქართველოს ყველა მოქალაქეს, აქვს ბუნებრივია სურვილი და უფლება, იყოს ამ პროცესებში ძალიან აქტიურად ჩართული, მათ შორის, ფიზიკურად. რა გასაკვირია, რომ მიხეილ სააკაშვილს ამის სურვილი აქვს, გაუჩნდა და გეგმავს საქართველოში ჩამოსვლა. მე მის ადგილზე უკვე საქართველოში ვიქნებოდი და აუცილებლად ჩამოვიდოდი, არ დაგიმალავთ, ბევრჯერ მითქვამს. იმიტომ, რომ ეს არის ისტორიული გამოწვევა", - თქვა ნიკა მელიამ.
ამასთან, ნიკა მელიას თქმით, პროცესი სრულიად მშვიდობიანად უნდა წარიმართოს.
"ყველაფერთან ერთად, ჩვენ ჭკუით უნდა ვაჯობოთ ქართულ ოცნებას. ძალიან მნიშვნელოვანია, რომ არ მივცეთ პროვოკაციასა და დესტაბილიზაციაში დადანაშაულების შესაძლებლობა, რომელსაც მერე საერთაშორისო საზოგადოებაც აჰყვება, ანუ, ჭკუით უნდა ვაჯობოთ", - დასძინა მელიამ.
შეგახსენებთ, მიხელ სააკაშვილმა საქართველოში დაბრუნება კიდევ ერთხელ დაანონსა. კონკრეტული დეტალები არ გაუმჟღავნებია, თუმცა აღნიშნა, რომ ადგილობრივი თვითმმართველობის არჩევნებისთვის უკვე საქართველოში სურს ყოფნა.
