ფასიანი სახელმწიფო სანომრე ნიშნის შეძენის მსურველებს "ლიბერთი ბანკის" ახალი განვადების პროდუქტის LIB-001 მეშვეობით, შეუძლიათ შეიძინონ ფასიანი სახელმწიფო სანომრე ნიშნები განვადებით.
როგორც "ლიბერთი ბანკიდან" "ჯი-ეიჩ-ენს" აცნობეს, LIB-001 სწრაფად და მარტივად გაიცემა მსურველის მიერ მხოლოდ პირადობის დამადასტურებელი დოკუმენტის წარდგენის საფუძველზე სსიპ საქართველოს შინაგან საქმეთა სამინისტროს მომსახურების სააგენტოში არსებულ ლიბერთი ბანკის სალაროებში. ამასთან, განვადება LIB-001 სარგებლობის შემთხვევაში ყველა კლიენტს უფასოდ გაეხსნება მულტისავალუტო ლიბერთი ანგარიში, რომლის მეშვეობითაც შესაძლებელია ფულადი სახსრების მარტივი და ეფექტური მართვა.
ცნობისათვის: განვადება LIB-001 მინიმალური ვადა არის 3 თვე, ხოლო მაქსიმალური - 12 თვე. სესხი გაიცემა ლარში, 50-დან 800 ლარის ოდენობით. სესხის მომსახურების საკომისიო შეადგენს განვადების თანხის 2.5%-ს თვეში.
ფასიანი სანომრე ნიშნის შეძენისას მსურველებს შეუძლიათ აირჩიონ მათთვის სასურველი სანომრე ნიშნის ნებისმიერი კომბინაცია. მაგალითისათვის: ისეთი ნომერი, რომლის ლათინურ შრიფტის სამივე ასო იდენტურია, ხოლო ციფრების კომბინაცია იცვლება 001-დან 009-ის ჩათვლით ან ლათინური შრიფტის სამივე ასო იდენტურია, ხოლო ციფრების კომბინაციაა 100, 200, 300, 400, 500, 600, 700, 800, 900 და ასე შემდეგ.