ჩვენ განსაკუთრებულ ყურადღებას ვუთმობთ ინფრასტრუქტურის განვითარებას; 32 მილიარდი ლარის ინვესტიცია არის დაგეგმილი მომდევნო წლების განმავლობაში; გზების მშენებლობა, წყლის პროექტები, გამწმენდი ნაგებობების მოწყობა ყველა მუნიციპალიტეტში, არის განსაზღვრული იმ გეგმის ფარგლებში, რომელიც ბატონმა ირაკლი ქარსელაძემ შეიმუშავა, - ამის შესახებ საქართველოს პრემიერ-მინისტრმა ირაკლი ღარიბაშვილმა „ქართული ოცნების" წყალტუბოს მერობის კანდიდატის, გენადი ბალანჩივაძის წარდგენისას განაცხადა.
მთავრობის მეთაურის თქმით, მკაფიოდ ჩამოყალიბებული გეგმა არსებობს ყველა სექტორის მიმართულებით.
„ამ ყველაფერს სჭირდება მშვიდობიანი განვითარება, მშვიდობის და სტაბილურობის შენარჩუნება. მე აქ ვხედავ წარმატებულ ბიზნესმენებს და მინდა, აღვნიშნო, თუ რაოდენ დიდი მნიშვნელობა აქვს მეწარმისთვის, ბიზნესმენისთვის სტაბილურობას და ამ შემთხვევაში პოლიტიკურ სტაბილურობას. ბიზნესმენი კი არა, ვერც ერთი მოქალაქე ვერ დაგეგმავს ვერც ერთ ახალ პროექტს, ვერ წამოიწყებს ახალი იდეის განხორციელებას, თუ ქვეყანაში არ იქნება პოლიტიკური სტაბილურობა. სწორედ ამ სტაბილურობის მიღწევა გახდა შესაძლებელი ჩვენი ხელისუფლების დროს. ის, რომ ქვეყანაში არ ყოფილა ომი და სერიოზული კონფლიქტი და დაპირისპირება, არის სწორედ „ქართული ოცნების" დამსახურება, მაგრამ ამ ყველაფერს სჭირდება შენარჩუნება და სწორედ ამიტომ, ახლა მობილიზებას ვაკეთებთ იმისთვის, რომ ძალიან ძლიერად, დამაჯერებლად გავიმარჯვოთ ყველა ქალაქსა და მუნიციპალიტეტში, იმისთვის, რომ მომდევნო 3 წელი იყოს აღმშენებლობის, მშენებლობის, განვითარების წლები. მოგეხსენებათ, მომდევნო 3 წელი ასევე გამონაკლისი პერიოდი იქნება, როცა ქვეყანაში 2024 წლამდე აღარ იქნება არჩევნები. მანამდე, 8 წლის განმავლობაში 7 არჩევნები ჩავატარეთ და დამეთანხმებით, ძალიან რთული იყო ამ პერიოდში ერთის მხრივ სტაბილურობის შენარჩუნებაზე მუშაობა და ზრუნვა და მეორეს მხრივ, იმ გამოწვევების ფონზე, რომლის წინაშეც ქვეყანა იმყოფება, ვგულისხმობ ოკუპაციას, ამ პროცესის მართვა და დეესკალაცია, შიდა პოლიტიკური პროცესის მართვა, წარმატებული საგარეო პოლიტიკის გატარება. ჩვენ მართლაც გვაქვს ხელშესახები მიღწევები, რომელსაც ყველამ ერთად მივაღწიეთ, იქნება ეს უვიზო რეჟიმი, ასოცირების შეთანხმება თუ უამრავი სხვა წარმატება, რომელსაც „ქართულმა ოცნებამ" მიაღწია. მეორეს მხრივ, უნდა აღინიშნოს განვითარება. ყველა იმ პროექტს, რომელიც განვახორციელეთ, რა თქმა უნდა, სჭირდებოდა პარალელურად მართვა და ზრუნვა. ამიტომაც, მეგობრებო, ჩვენ, გაათმაგებული ენერგიით, გაათმაგებული მოტივაციით უნდა გავაგრძელოთ ჩვენი ქვეყნის მშენებლობა. ჩვენი მოსახლეობის მთავარი გამოწვევა დღეს არის უმუშევრობა და სიღარიბე და ყველა ადამიანის, ყველა პოლიტიკოსის, ყველა მოქალაქის საერთო საზრუნავი ეს უნდა იყოს, რომ რაც შეიძლება მოკლე პერიოდში დავამარცხოთ სიღარიბე და შევქმნათ მეტი სამუშაო ადგილები. რა თქმა უნდა, მთავრობა ამას მარტო ვერ გააკეთებს და აუცილებელია კერძო სექტორის ჩართულობა ამ მიმართულებით. მთავრობის ვალდებულებაა, ყველაფერი გააკეთოს იმისთვის, რომ კერძო სექტორი განვითარდეს, ბიზნესი განვითარდეს, როგორც მსხვილი, ასევე მცირე, საშუალო მეწარმეობა განვითარდეს ყველა მიმართულებით", - განაცხადა პრემიერ-მინისტრმა.
