საქართველოს მესამე პრეზიდენტი მიხეილ სააკაშვილი "ქართლი ოცნების" თავმჯდომარის, ირაკლი კობახიძის განცხადებას გამოეხმაურა.
ირაკლი კობახიძემ განაცხადა, რომ ევროკავშირის მიერ მაკროფინანსური დახმარების გამოყოფას ფინანსური დატვირთვა არ აქვს, რადგან ის არის 75 მილიონი ევროს კრედიტი.
"საქართველოს ბიუჯეტში კი დამატებით დაახლოებით 1 მლრდ ლარის აკუმულირება მოხერდა და გამომდინარე იქიდან, რომ მაღალი ეკონომიკური ზრდის მაჩვენებელია, ამას ფინანსური დატვირთვა აღარ აქვს", - თქვა კობახიძემ.
სააკაშვილი კობახიძის განცხადებას შემდეგნაირად პასუხობს:
"ჯერ ერთი, თუ ერთი მილიარდი ლარი გაქვთ გადანახული თქვე უდღეურებო, რატომ არ ურიგებთ გაღატაკებულ და გაძვალტყავებულ ხალხს?! მთავარი, რაც ხდება პირველად თავის ისტორიაში, საქართველო რჩება ევროკავშირის ფინანსური დახმარების გარეშე.
აი, რას მიაღწიეს ამათ, იმ დემოკრატიით, რომლითაც ევროპა უნდა განეცვიფრებინათ, მაგრამ მე მინდა მართლაც მოვუწოდო ევროკავშირს, შეუწყვიტოს ამ რეჟიმს ფინანსური დახმარება იმიტომ, რომ ქართველ ხალხამდე არაფერი არ აღწევს, ელიტური კორუფციის გამო.
ის მთლიანად ხმარდება მათ ვილებს, ხვდება მათ ანგარიშებზე უცხოეთში, რომლებიც გადანახული აქვთ შავი დღისთვის იმიტომ, რომ ისინი ემზადებიან გასაქცევად მას შემდეგ, რაც ბოლომდე ლიმონივით გამოწურავენ საქართველოს.
როგორც იქნა, ევროკავშირმა თავის მოხსენების პროექტში ჩაწერა ელიტური კორუფციის საკითხი და უკვე ბოლო ორი კვირაა "ქართული ოცნება" ისტერიულად ლობირებს.
თავისი მრავალმილიონიანი ხელფასიანი ლობისტების მეშვეობით, რომ იქნებ ეს ელიტური კორუფცია ამოიღონ მოხსენების დრაფტიდან - როგორც ჩანს, ეს საკითხი ბოლომდე ჩაუფლავდათ.
ელიტური კორუფცია შევარდნაძის დროსაც კი არ ჩაუწერია ევროკავშირს მოხსენებაში - ჩემ დროზე აღარ ვსაუბრობ. ელიტური კორუფცია ადამიანურ ენაზე რომ ვთარგმნოთ ნიშნავს ივანიშვილის და მთავრობის წევრების პირდაპირ ჩართვას ქართველი ხალხის ძარცვაში".
