პარტია „საქართველოსთვის“ თავმჯდომარე, გიორგი გახარიამ აჭარის რეგიონში მერობისა და მაჟორიტარობის კანდიდატები წარადგინა.
ბათუმის მერობის კანდიდატი ირაკლი მიქელაძეა, შუახევში მერობისთვის შალვა გოგიტიძე იბრძოლებს, ხელვაჩაურში ჯუმბერ ბერიძე, ქედაში ელგუჯა ნაკაშიძე, ქობულეთში ირაკლი ბერიძე, ხულოს მერობის კანდიდატი კი გია აბულაძეა.
რაც შეეხება პარტია „საქართველოსთვის“ ბათუმის მაჟორიტარობის კანდიდატებს, მათი ათეული ასე გამოიყურება. 1. მინდია დევაძე (აეროპორტი, გონიო, კვარიათი); 2. დავით თავართქილაძე (ძველი ბათუმი, რუსთაველის ქუჩის დასახლება); 3. ბექა წუწუნავა (მახინჯაური, თამარის დასახლება, ბარცხანა, გოროდოკის დასახლება); 4. თამილა ფაღავა (ხიმშიაშვილის ადმინისტრაციული საარჩევნო ოლქი); 5. ჯემალ ანანიძე (აღმაშენებელისა და შემოერთებული ტერიტორია); 6. ლაშა ქობულია (ბონისა და ბაგრატიონის დასახლება); 7. ნაზი აბაშიძე – (ჯავახიშვილისა და ბაგრატიონის დასახლება).
პარტია „საქართველოსთვის“ თავმჯდომარე გიორგი გახარიამ სიტყვით გამოსვლისას მათ პროგრამაზე, პრიორიტეტზე, ასევე სამოქმედო გეგმაზე ისაუბრა და განაცხადა, რომ მის მიერ დასახელებული ყველა კანდიდატი ღირსეულია და მოსახლეობის სრული მხარდაჭერა ექნებათ.
პარტიამ „საქართველოსთვის“ აჭარაში კანდიდატების წარდგენის ღონისძიება დამსწრეების გარეშე ჩაატარა.
„დღეს ეს ღონისძიება უნდა ყოფილიყო სხვანაირი. დღეს აქ უნდა ყოფილიყო ძალიან ბევრი ჩვენი მხარდამჭერი, თუმცა, უმძიმესი ეპიდემიოლოგიური მდგომარეობიდან გამომდინარე, ჩვენ ყველამ ერთად მივიღეთ გადაწყვეტილება, რომ ღონისძიება ჩვენ უნდა ჩავატაროთ დამსწრეების გარეშე და ეს არის ჩვენი სოლიდარობა ქართველი ექიმების წინაშე, რომლებიც დღეს ებრძვიან პანდემიას და რა თქმა უნდა, ეს არის ჩვენი დიდი მწუხარების გამოხატვა გარდაცვლილების წინაშე.
ყველას კარგად უნდა გვესმოდეს, რომ დღეს საქართველოში მძვინვარებს პანდემია და უნდა ვიცოდეთ, რომ პანდემია არ არის მხოლოდ სამედიცინო პრობლემა. პანდემია დღეს მსოფლიოშიც და საქართველოშიც არის სოციალური პრობლემა და ჩვენ ყველა ერთად უნდა ვებრძოდეთ და ერთად გავიმარჯვოთ ამ გამოწვევაზე“ – განაცხადა გახარიამ.
