„ჩვენი პოზიცია არის შემდეგი, რომ ხელისუფლებამ უნდა აიღოს პასუხისმგებლობა და რა თქმა უნდა, მას შემდეგ, რაც სრული პასუხისმგებლობა დაეკისრებათ მათ, ჩვენ ვიმსჯელებთ ყველა საკითხზე", - აცხადებს "ნაციონალური მოძრაობის“ წარმომადგენელი ხატია დეკანოიძე არჩევნების გადადებასთან დაკავშირებით.
მისი განმარტებით, მთელი ამ პერიოდის განმავლობაში არაფერი გაკეთდა იმისთვის, რომ მოგვარებულიყო უმძიმესი ეპიდემიოლოგიური სიტუაცია.
"შესაბამისად, ახლა ხელისუფლების რიტორიკა, რომელიც ამბობს, რომ ეს არის ოპოზიციის სისუსტე და ოპოზიციის შემოგდებული თემა, ამაშიც, ისინი არიან ძალიან "ღია და გამჭვირვალე", რომ მათ ადამიანების სიცოცხლე არ აინტერესებთ. ჩვენ ყველა ვარიანტისთვის მზად ვართ, განვიხილავთ ყველა ვარიანტს და უპირველეს ყოვლისა, ჩვენ გვაინტერესებს ადამიანების ჯანმრთელობა და უსაფრთხოება", - განაცხადა ხატია დეკანოიძემ.
უმძიმესი ეპიდემიოლოგიური ვითარების ფონზე, სახალხო დამცველმა ნინო ლომჯარიამ პოლიტიკურ პარტიებს არჩევნების გადადების საკითხზე მსჯელობისკენ მოუწოდა.
სახალხო დამცველი მოწოდებას გამოეხმაურნენ "სტრატეგია აღმაშენებლის" ლიდერი გიორგი ვაშაძე და "ლელოს" ლიდერი ბადრი ჯაფარიძე, რომელთაც განაცხადეს, რომ მზად არიან ხელისუფლებასთან იმსჯელონ ამ საკითხზე. ხელისუფლება კი აცხადებს, რომ სახალხო დამცველის განცხადება მაშველი რგოლი აღმოჩნდა ოპოზიციისთვის, რომელსაც არჩევნებში წაგების ეშინია.
