ახმეტის მუნიციპალიტეტს აქვს სოფლის მეურნეობის, მცირე და საშუალო ბიზნესის, ტურიზმის განვითარების დიდი პოტენციალი, რასაც ხელს უწყობს ჩვენი 400-ზე მეტი ისტორიულ-კულტურული მემკვიდრეობის ძეგლი. ამ ყველაფრის განვითარებას ეტაპობრივად დასჭირდება ხელშეწყობა შესაბამისი ინფრასტრუქტურული პროექტებით, რის განსახორციელებლადაც გვექნება ცენტრალური ხელისუფლების მხარდაჭერა - განაცხადა „ქართული ოცნების“ ახმეტის მერობის კანდიდატმა ალექსი ფიცხელაურმა წარდგენაზე.
მისი თქმით, „ქართული ოცნება“ ხელისუფლებაში მოსვლის დღიდან ახორციელებს მრავალ ინფრასტრუქტურულ პროექტს, თუმცა, ჯერ კიდევ არსებობს პრობლემები, რომელთაც დროული გადაჭრა სჭირდება. მერობის კანდიდატმა მადლობა გადაუხადა „ქართული ოცნების“ გუნდს გამოცხადებული ნდობისთვის.
„მე დავიბადე და გავიზარდე ახმეტაში, თქვენს წინაშე გამოსვლა ჩემთვის უდიდესი პასუხისმგებლობაა, მითუმეტეს, რომ დღეს, ჩემთვის ძალიან მნიშვნელოვანი დღეა. მაქვს პატივი, წარდგენილი ვიყო ახმეტის მუნიციპალიტეტის მერობის კანდიდატად. ამისთვის, მინდა მადლობა გადავუხადო, ჩვენს პოლიტიკურ გუნდს ,,ქართულ ოცნებას’’ და მის ლიდერებს, რომლებმაც ნდობა გამომიცხადეს და საშუალება მომცეს, თქვენი მხარდაჭერით ჩემს ახმეტას და ახმეტელებს ვემსახურო. „ქართული ოცნება“ ხელისუფლებაში მოსვლის დღიდან ახორციელებს მრავალ ინფრასტრუქტურულ პროექტებს, მაგრამ ჯერ კიდევ გვაქვს პრობლემები, რომელთაც დროული გადაჭრა ესაჭიროება. ჩვენს მუნიციპალიტეტს აქვს დიდი პოტენციალი სოფლის მეურნეობის, მცირე და საშუალო ბიზნესის განვითარებაში. ასევე ტურიზმის, ეს იქნება აგროტურიზმი, გასტროტურიზმი, ეკოტურიზმი თუ ღვინის ტურიზმი, რასაც ხელს უწყობს ჩვენი 400-ზე მეტი ისტორიულ-კულტურული მემკვიდრეობის ძეგლი. თუშეთი თუ ტბათანა, ილტოს თუ პანკისის ხეობები. ასევე, ფშავ-ხევსურული, თუშური და ქისტური სამზარეულო. ამ ყველაფრის განვითარებას ეტაპობრივად დასჭირდება ხელშეწყობა შესაბამისი ინფრასტრუქტურული პროექტებით, რის განსახორციელებლადაც გვექნება ცენტრალური ხელისუფლების მხარდაჭერა. ადგილობრივი თვითმმართველობის არჩევნები თავისი არსით ძალიან მნიშვნელოვანია. ახმეტელები პირდაპირ ვირჩევთ მერს, რომელმაც მუნიციპალიტეტის განვითარებაზე უნდა იზრუნოს და ცენტრალურ ხელისუფლებას აქტიურად ეთანამშრომლოს, რათა რაც შეიძლება მეტი რესურსი გვქონდეს იმისთვის, რომ თავად გადავჭრათ ის პრობლემები, რომლის წინაშეც ჩვენი მუნიციპალიტეტი და ჩვენი ხალხი იმყოფება. მჯერა, რომ ჩვენი მოსახლეობა სწორ არჩევანს გააკეთებს, გამოგვიცხადებს ნდობას მე და ჩვენს პოლიტიკურ გუნდს“ - განაცხადა ალექსი ფიცხელაურმა.
მერობის კანდიდატმა საკრებულოში „ქართული ოცნების“ კანდიდატები წარადგინა.
„მინდა წარმოგიდგინოთ ჩვენი გუნდი საკრებულოში. წარმოგიდგენთ კახა მამულაშვილს, ზეზვა უძილაურს, დავით ავაზაშვილს, ზეზვა ფიცხელაურს, ბესო კაიშვილს, გიორგი მამუჩარაშვილს, რევაზ გახუაშვილს, ელდარ ბაღაკაშვილს, თამაზ ალხანაშვილს და ასევე, სერგო მელწაიძეს, რომელიც საპატიო მიზეზის გამო ჩვენს გვერდით არ არის დღეს, მაგრამ ხვალიდან შემოგვიერთდება“ - განაცხადა ალექსი ფიცხელაურმა.
