პარლამენტისთვის ძალზედ მნიშვნელოვანია ის საგამოძიებო პროცესი, რომელსაც სამართალდამცავი სტრუქტურები აწარმოებენ, აცხადებს პარლამენტის ვიცე-სპიკერი არჩილ თალაკვაძე 5 -6 ივლისის მოვლენებთან დაკავშირებით საგამოძიებო კომისიის შექმნის თაობაზე ოპოზიციის ინიციატივას. მისი განმარტებით, ხელისუფლება არ დაელოდა რაიმე კომისიის შექმნას პარლამენტში, ხელისუფლება მოქმედებდა მყისიერად იმ პასუხისმგებლობის ფარგლებში, რომელიც აქვს შესაბამის სტრუქტურებს, რომ გამოეძიებინათ ძალადობის ფაქტები.
"შემდგომში ოპოზიციამ დააყენა კომისიის შექმნის საკითხი, მათ აქვთ საკმარისი ხმები პარლამენტში. უკვე მერამდენედ აანონსებენ სხვადასხვა კომისიის შექმნას და ბოლოს და ბოლოს თუ შეუძლიათ, შექმნან ასეთი კომისია და აჩვენონ საზოგადოებას, რომ საპარლამენტო მუშაობაში ჩართვა შეუძლიათ და არ ხედავენ პარლამენტს როგორც ქუჩის პროცესებს, რასაც მიჩვეულნი არიან. ამაზე პარლამენტი იმსჯელებს და ვნახოთ, ნებისმიერ შემთხვევაში, პარლამენტისთვის ძალზედ მნიშვნელოვანია ის საგამოძიებო პროცესი, რომელსაც სამართალდამცავი სტრუქტურები აწარმოებენ და აღმასრულებელ ხელისუფლებას და სამართალდამცავ სტრუქტურებს აქვთ სრული საკანონმდებლო მხარდაჭერა პარლამენტიდან, რომ კონკრეტული პირების ბრალეულობა დადგინდეს და პასუხისგებაში მიეცნენ ისინი, ვინც დაარღვია კანონი,“ - განაცხადა თალაკვაძემ.
