დღეისათვის, მთელი ქვეყნის მასშტაბით, 1 328 თავისუფალი საწოლია დარჩენილი. ჯანდაცვის მინისტრის პირველი მოადგილის თამარ გაბუნიას განცხადებით COVID-დადებითი ბავშვთა საწოლებთან დაკავშირებითაც, ჯერჯერობით დეფიციტი არ არის.
„როგორც მოგეხსენებათ, გასული 24 საათის განმავლობაში 2600-ზე მეტი ახალი შემთხვევაა დაფიქსირდა. ყველა ხედავს, შემთხვევების ოდენობა იმატებს და ეს ნიშნავს, რომ სიტუაცია საკმაოდ საყურადღებოა. სამწუხაროდ იყო 26 გარდაცვალება, რაც ასევე არის ჩვენთვის განგაშის საფუძველი.
ამ დროისთვის მობილიზებულია 5 745 საწოლი თბილისსა და რეგიონებში. მეტი დატვირთვა არის თბილისში, ქუთაისსა და ბათუმში შემთხვევების მაღალი რაოდენობის გამო. კლინიკებში 4495 პირია განთავსებული, მათ შორის 895 ინტენსიურ განყოფილებაში, 183 რეანიმაციაში. თავისუფალი საწოლია 1328.
ბოლო პერიოდში, აქტიურად მოხდა ბავშვთა საწოლფონდის მობილიზება. ამ ეტაპზე, დეფიციტი ბავშვთა საწოლებთან მიმართებით არ აღინიშნება, მოთხოვნასა და მიწოდებას შორის ბალანსი მიღწეულია“, - განაცხადა გაბუნიამ.
