უკრაინა "მოდერნას" ვაქცინის დოზებს მიიღებს. ამის შესახებ უკრაინის ჯანდაცვის მინისტრმა, ვიქტორ ლიაშკომ განაცხადა.
მინისტრის განმარტებით, მიმდინარე შაბათ-კვირას უკრაინა "მოდერნას" ვაქცინის 2 მლნ დოზა მიიღებს.
"შაბათიდან კვირის ჩათვლით ჩვენ ველოდებით თვითმფრინავს, რომელიც 2 მლნ დოზა მოდერნას ვაქცინას ჩამოიტანს. ეს კი ყოველდღიური ვაქცინაციის ტემპს გაზრდის",- განაცხადა მინისტრმა.
უკრაინის ჯანდაცვის სამინისტროს გეგმაა, რომ 100 სამუშაო დღეში 10 მლნ ვაქცინის გაკეთება უზრუნველყოს.
შეგახსენებთ, ფარმაცევტულ კომპანია "მოდერნასთან" ვაქცინის შესყიდვის მიზნით მოლაპარაკებებს საქართველოს მთავრობაც აწარმოებდა. ივლისის დასაწყისში ცნობილი გახდა, რომ მოლაპარაკება ვერ შედგა და საქართველო "მოდერნას" წარმოებულ პრეპარატს ვერ მიიღებდა.
ჯანდაცვის მინისტრის მოადგილის, თამარ გაბუნიას განცხადებით, მოდერნას პირობები "ქართული მხარისთვის მისაღები არ იყო".
დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორმა, ამირან გამყრელიძემ დღეს ჟურნალისტებისთვის გამართულ ვებინარზე განაცხადა, რომ "მოდერნასთან" შეთანხმება ვერ შედგა, რადგან ვაქცინის მიწოდების დროთ კომპანია 2022 წელს ასახელებდა.
"მოდერნასთან ძირითადი არსი გახლდათ, რომ მოწოდების ძირითადი დრო იყო მომავალი წელი, 2022 წელი. ანუ იქაც ითხოვდნენ საკმაოდ, პირობები იყო არცთუ მისაღები. მოგეხსენებათ, მოდერნა ერთ-ერთი საუკეთესო ვაქცინაა, რა თქმა უნდა, ბევრი იყო მასთან მოლაპარაკება, მაგრამ წლევანდელ 2021 წელზე, როცა ძირითადად გვიჭირდა ვაქცინების მოპოვება, იქ ნაკლები ხელმისაწვდომობა იყო, აქცენტი იყო 2022 წელზე. ამიტომაც ამ ეტაპზე, უარი იყო", - განაცხადა გამყრელიძემ.