შეერთებული შტატების პრეზიდენტმა, ჯო ბაიდენმა კუბის ხელისუფლებას მოუწოდა, თავი შეიკავოს მშვიდობიანი დემონსტრანტების მიმართ ძალადობისგან და პატივი სცეს მათ უფლებას "თავად განსაზღვრონ საკუთარი მომავალი".
"შეერთებული შტატები მოუწოდებს კუბის რეჟიმს, მოუსმინოს თავის ხალხს და ამ კრიტიკულ მომენტში, საკუთარ თავზე ფიქრის ნაცვლად, დააკმაყოფილოს მათი საჭიროებები", - განაცხადა ბაიდენმა.
მსგავსი განცხადება გააკეთა ევროკავშირის უმაღლესმა წარმომადგენელმა საგარეო საქმეთა და უსაფრთხოების პოლიტიკის საკითხებში ჟოზეპ ბორელმა.
"მინდა ხაზი გავუსვა კუბელი ხალხის უფლებას, მშვიდობიანად გამოთქვან საკუთარი აზრი და ვთხოვ მთავრობას, ყურადღება მიაქციოს ამ უკმაყოფილებას", - თქვა ბორელმა.
რამოდენიმე ათწლეულის განმავლობაში პირველად კუბაში ანტისამთავრობო მასობრივი საპროტესტო აქციები მიმდინარეობს. ათასობით ადამიანი გამოხატავს უკმაყოფილებას ქვეყანაში შექმნილი მძიმე ეკონომიკური მდგომარეობის გამო და ითხოვს სამოქალაქო უფლებებსა და თავისუფლებებს.
გარდა ამისა, დემონსტრანტები ხელისუფლებისგან მოსთხოვენ მოსახლეობის კორონავირუსის საწინააღმდეგო ვაქცინებით უზრუნველყოფას და ელექტროენერგიის ყოველდღიური გათიშვების დასრულებას.
სოციალურ მედიაში გავრცელებული ინფორმაციის თანახმად, პოლიციამ დემონსტრაციები ძალადობით დაარბია. კუბის ხელისუფლება აცხადებს, რომ კუბაში საპროტესტო ტალღას შეერთებული შტატები მართავს, რათა "ძირი გამოუთხაროს ქვეყნის სტაბილურობას".