ბრძოლის ერთადერთი სტრატეგიული მიზანიც და ტაქტიკური ამოცანაც, მხოლოდ ხელისუფლების შეცვლა უნდა იყოს, წერს სოციალურ ქსელში ზურაბ ჭიაბერაშვილი. მისი განმარტებით, მოძალადე ჯგუფები არსებობს დემოკრატიულ ქვეყნებშიც, მაგრამ იქ მათ კანონის უზენაესობა, სახელმწიფო ინსტიტუტები და დასჯის შიში აკავებს.
"რელიგიურ ორგანიზაციებს დემოკრატიულ ქვეყნებშიც აქვთ მცდელობა, ზნეობის მათებული გაგება თავს მოახვიონ მთელ საზოგადოებას - ზოგჯერ ძალადობრივი გზითაც - მაგრამ იქ მათ მცდელობას აკავებს კანონის უზენაესობა, სახელმწიფო ინსტიტუტები და საზოგადოების მიერ გათავისებული ტრადიცია სეკულირიზმისა.
ანაფორებსა და ჩოხებში შემძვრალ სიბნელეს ვერ გავაჩერებთ, თუ ჯერ სახელმწიფო ინსტიტუტები არ დავიბრუნეთ და კანონის უზენაესობა არ დავამკვიდრეთ.
სრულიად მესმის ის სიბრაზე, რაც ანაფორიანი ბანდიტების მიმართაა, მაგრამ ეს უშედეგო სიბრაზე იქნება, ვიდრე სახელმწიფო ინსტიტუტები მიტაცები აქვთ რეჟიმს, რომლისთვისაც ეს სიბნელე სახელმწიფოებრიობისთვის შექმნილი საფრთხე კი არაა, არამედ ძალაუფლების შენარჩუნების საშუალება.
სანამ ბანდიტი ბასილი მკალავიშვილი იეღოველებს ქუჩაში ცემდა და ტელეკამერების წინ თავს პარსავდა, შევარდნაძის რეჟიმის მდუმარე უმრავლესობა ან დაბნეული იყო, ან ამბობდა “ძალადობა ცუდია, მაგრამ…” ეს ძალადობა მხოლოდ ხელისუფლების შეცვლამ გააჩერა. ახლაც მხოლოდ ასეა შესაძლებელი, სეკულარიზმის ხაზი ქვეყანაში მკაფიოდ გავავლოთ.
ამიტომ ბრძოლის ერთადერთი სტრატეგიული მიზანიც და ტაქტიკური ამოცანაც მხოლოდ ხელისუფლების შეცვლა უნდა იყოს", წერს ზურაბ ჭიაბერაშვილი.
