ევროპარლამენტარები მარინა კალიურანდი, ვიოლა ფონ კრამონი და სვენ მიქსერი გმობენ თბილისში მომხდარ ძალადობრივ თავდასხმებს და ხელისუფლებას დამნაშავეთა დასჯისკენ მოუწოდებენ. ამის შესახებ ნათქვამია ევროპარლამენტარების ერთობლივ განცხადებაში.
"მკაცრად ვგმობთ თბილისში მომხდარ ძალადობრივ თავდასხმებს სამოქალაქო აქტივისტების, თემის წევრებისა და ჟურნალისტების წინააღმდეგ, რამაც იძულებული გახადა ორგანიზატორები, გაეუქმებინათ ლგბტქ "ღირსების მარშის" მსვლელობა.
სამწუხაროდ, საქართველოს ხელისუფლებამ და რელიგიურმა ლიდერებმა, პრაიდის მსვლელობის წინ, მკაფიოდ და გარკვევით არ ისაუბრეს ჰომოფობიური რიტორიკის წინააღმდეგ.
ვწუხვართ, რომ საქართველოს მთავრობა მზად არ აღმოჩნდა ტოლერანტობისადმი მიძღვნილი შეკრების უსაფრთხოება უზრუნველეყო. ისევე როგორც სხვა მოქალაქეებს, ლგბქტ ადამიანებს უნდა შეეძლოთ თავიანთი კონსტიტუციით გარანტირებული უფლებებით სარგებლობა, მშვიდობიან შეკრებაში მონაწილეობა.
საქართველოს ხელისუფლებამ ხმამაღლა განაცხადა თავისი განზრახვის შესახებ, 2024 წელს ევროკავშირში წევრობის განაცხადის ოფიციალურ შეტანაზე. გვსურს შევახსენოთ მათ, ევროკავშირში გაწევრიანების წინაპირობები, ცნობილი როგორც კოპენჰაგენის კრიტერიუმები, გულისხმობს სხვა საკითხებთან ერთად იმას, რომ ქვეყანას აქვს ინსტიტუტების სტაბილურობა, რაც დემოკრატიას, კანონის უზენაესობას, ადამიანის უფლებებსა და უმცირესობების პატივისცემასა და დაცვას უზრუნველყოფს.
ველით, რომ საქართველოს ხელისუფლება დააკავებს ძალადობის ჩამდენ პირებს და კანონის მთელი სიმკაცრით პასუხს აგებინებს მათ", - აცხადებენ ევროპარლამენტარები.
