კანადის პრემიერ-მინისტრმა, ჯასტინ ტრუდომ კანადის გენერალ-გუბერნატორის პოსტზე წარადგინა მერი სიმონი, მკვიდრი მოსახლეობის პირველი წარმომადგენელი, რომელსიც ამ თანამდებობაზე იმუშავებს.
ყოფილი დიპლომატი და ინუიტების (ჩრდილოეთ კანადის მკვიდრი ხალხი) უფლებების დამცველი, მერი სიმონი იქნება კანადის სახელმწიფოს მეთაურის, დედოფალ ელისაბედ მეორის წარმომადგენელი.
მერი სიმონის ამ თანამდებობაზე წარდგენის ფონია, კანადელების მზარდი აღშფოთება ქვეყნის მკვიდრი მოსახლეობისთვის განკუთვნილი სკოლა-პანსიონსების სიახლოვეს ბავშვების სამარხების აღმოჩენის გამო.
მე-19, მე-20 საუკუნეების განმავლობაში, კანადის მკვიდრი მოსახლეობის ოჯახებიდან 150 000-ზე მეტი ბავშვი იძულებით წაიყვანეს სკოლა-პანსიონებში, რათა მათი საზოგადოებაში ასიმილაცია მოეხდინათ.
ამ სკოლებში სწავლისას დაახლოებით 6 000 ბავშვი დაიღუპა. მოსწავლეებს ხშირად ათავსებდნენ ცუდად აშენებულ, გათბობის გარეშე, ანტისანიტარიულ შენობებში.
მერი სიმონმა განაცხადა, რომ ამ თანამდებობაზე მისი წარდგენა "ისტორიული, მნიშვნელოვანი ნაბიჯია შერიგებისკენ მიმავალ გზასა და უფრო ინკლუზიური, სამართლიანი კანადური საზოგადოების მშენებლობისკენ".
კანადის გენერალ-გუბერნატორის თანამდებობა მას შემდეგ გახდა ვაკანტური, რაც დაახლოებით 6 თვის წინ, კანადის გენერალ-გუბერნატორი ჯული პაიეტი თანამშრომელთა მიმართ შევიწროების ბრალდებების ფონზე, გადადგა.
მიუხედავად იმისა, რომ კანადის გენერალ-გუბერნატორის როლი ძირითადად ცერემონიულია, მას რამდენიმე მნიშვნელოვანი მოვალეობა აკისრია.
იგი არის კანადის შეიარაღებული ძალების მთავარსარდალი. უფლება აქვს სამეფო სიტყვით გამოვიდეს ან შეაჩეროს პარლამენტის საქმიანობა. ანიჭებს სამეფო თანხმობას პარლამენტის მიერ მიღებულ კანონებს და იღებს პრემიერ-მინისტრის ფიცს.
მერი სიმონი უწინ დანიაში კანადის ელჩად მუშაობდა და ეროვნული ინუიტური ორგანიზაციის პრეზიდენტის თანამდებობას იკავებდა.
მერი სიმონი საუბრობს ინგლისურ და ინუკიტიტუტის ენაზე, მაგრამ არა ფრანგულად, რაც უჩვეულოა კანადისთვის. კანადაში ორი ოფიციალური ენაა, ინგლისური და ფრანგული, იშვიათია შემთხვევა, როდესაც გენერალ-გუბერნატორი ორივე ენას არ ფლობს. თუმცა მერი სიმონი აცხადებს, რომ იგი მზად არის ფრანგული ენის შესასწავლად.
კანადის სახელმწიფო მეთაური გაერთიანებული სამეფოს დედოფალი ელისაბედ მეორეა. დედოფალი თავის სამეფო რწმუნებულისა და წარმომადგენლის სახით ნიშნავს გენერალ-გუბერნატორს, კანადის პრემიერ-მინისტრის წარდგინებით.
