ოპოზიციური პოლიტიკური პარტიები უერთდებიან "გირჩი მეტი თავისუფლების" ლიდერის, ზურაბ ჯაფარიძის ინიციატივას პარლამენტის წინ მდუმარე საპროტესტო აქციის გამართვის თაობაზე.
ზურაბ ჯაფარიძე მოუწოდებს თანამოქალაქეებს, გამოვიდნენ საპროტესტო აქციაზე, რათა ყველას აჩვენონ, რომ საქართველოში ცივილიზებული ადამიანები ცხოვრობენ.
"დღეს საღამოს, 8 საათზე, გამოდით და ჩუმად დადექით. არავინ არაფერს გთხოვთ, არც მიტინგი იქნება, არც მიკროფონები, რაც ბღავილი და არაფერი. უბრალოდ გამოდით, ტ..კი გაანძრიეთ, 1 საათი დადექით და დაანახეთ ამ დედამო....ებს, რომ ამ ქვეყანაში ცხოვრობენ ცივილიზებული, ნორმალური ადამიანები, რომლებსაც უნდათ, რომ ნორმალური ქვეყანა ააშენონ", - განაცხადა ჯაფარიძემ.
ზურაბ ჯაფარიძის დაანონსებულ აქციას უერთდება "ევროპული საქართველო".
"20:00 საათზე ვიკრიბებით პარლამენტის წინ თავისუფლებისთვის, ბიძინა ივანიშვილის რეჟიმის და პუტინისტების წინააღმდეგ", - აცხადებს გიგა ბოკერია.
მდუმარე საპროტესტო აქციას შეუერთდება ელენე ხოშტარიას პოლიტიკური მოძრაობა "დროა".
"გუშინდელი დღე იყო უდიდესი დარტყმა საქართველოს სახელმწიფოებრიობასა და მის საფუძვლებზე. ჩვენ ვნახეთ სახელმწიფოს მიერ ორგანიზებული თავდასხმა ლგბტქი ადამიანებზე, ჟურნალისტებზე, აქტივისტებსა და სხვა მოქალაქეებზე. ახლა უმთავრესია, არ შეგვიპყროს უიმედობამ და არ ავირჩიოთ უმოქმედობა. პოლიტიკური მოძრაობა "დროა" უერთდება "გირჩი-მეტი თავისუფლების" მიერ დღეს, 20:00 საათზე პარლამენტის წინ დაგეგმილ აქციას. მოქმედების დროა! გავერთიანდეთ ჩვენი უფლებებისთვის და სახელმწიფოსთვის!", - აცხადებს ხოშტარია.
ფოტო: არქივი/TASS
