პრემიერ-მინისტრი, მთავრობის მეთაური, რომელიც ამ ქვეყანაში უსაფრთხოების, სტაბილურობის და ადამიანების უფლებების დაცვის გარანტი უნდა იყოს, მთავრობის სხდომაზე, პირდაპირ ახალისებს ძალადობას, - აცხადებს ენმ-ს ერთ-ერთი ლიდერი თინა ბოკუჩავა. ბოკუჩავამ დიპლომატიურ კორპუსსა და საერთაშორისო ორგანიზაციებს დაუყოვნებლივი რეაგირებისკენ მოუწოდა.
„ჩვენ ვხედავთ პარლამენტის შენობის წინ, ისევე, როგორც პარლამენტის შენობის უკან, განლაგებულია ძალიან აგრესიულად განწყობილი რადიკალური დაჯგუფება, რომელიც ებრძვის განსხვავებული აზრის მქონე ადამიანებს, ისინი თავს ესხმიან ჟურნალისტებს სხვადასხვა ტელევზიიებიდან, თავს ესხმიან ოპერატორებს, ანტისაოკუპაციო მოძრაობის „სირცხვილიას“ წევრებს და ცდილობენ, ძალადობრივად „სირცხვილიას“ ოფისში შეჭრას, ისინი ასევე ისვრიან საგნებს პარლამენტის შენობის მისამართით.
პრემიერ-მინისტრი, მთავრობის მეთაური, რომელიც უნდა იყოს ამ ქვეყანაში უსაფრთხოების, სტაბილურობის და ადამიანების უფლებების დაცვის გარანტი, მთავრობის სხდომაზე, პირდაპირ ახალისებს ამ ძალადობას და მოუწოდებს ძალადობრივი მოქმედებებისკენ. ღარიბაშვილმა ნაცვლად იმისა, რომ გააკეთოს ყველაფერი იმისთვის, რომ არ დაზიანდნენ ჟურნალისტები, ოპერატორები და მოქალაქეები, ადამიანის უფლებები ამ ქვეყანაში იყოს დაცული, პრაიდის ორგანიზება დააბრალა „ერთიან ნაციონალურ მოძრაობას“, მიხეილ სააკაშვილს და ამით პირდაპირ გაუხსნა გზა ძალადობას.
ჩვენ მოვუწოდებთ დიპლომატიურ კორპუსს, საქართველოს საერთაშორისო მეგობრებს, რომელთაც ადარდებთ ამ ქვეყნის სტაბილურობა და დემოკრატიული განვითარება, დაუყოვნებლივ მოახდინონ უკმაცრესი რეაგირება, რადგან მსგავსი დაპირისპირება და ქაოსი ქვეყნისთვის უკიდურესად სახიფათოა“, - განაცხადა ბოკუჩავამ.
