ფილიპინებში, ფილიპინების საჰაერო ძალების სამხედრო-სატრანსპორტო თვითმფრინავა C-130 კატასტროფა განიცადა. იუწყება ფილიპინების სამხედრო სარდლობის ადმინისტრაცია.
მათი ცნობით, ბორტზე 85 ადამიანი იმყოფებოდა.
Associated Press-ის ინფორმაციით, სამაშველო ოპერაციის დროს სულ მცირე 40 ადამიანის გადარჩენა შეძლეს. ბოლო ცნობებით, ნაპოვნია 16 ადამიანის ცხედარი.
სამაშველო ოპერაცია კვლავ გრძელდება.
როგორც იუწყებიან, კატასტროფა მაშინ მოხდა, როდესაც თვითმფრინავი სულუს პროვინციის კუნძულ ჰოლოზე დაშვებას ცდილობდა.
კატასტროფის გამომწვევი მიზეზები ჯერჯერობით უცნობია. ფილიპინების იმ ნაწილში, სადაც კატასტროფა მოხდა გადაუღებლად წვიმს, თუმცა საერთაშორისო მედიის ცნობით, ნაადრევია იმის თქმა, უამინდობამ გამოიწვია თუ არა ტრაგედია.
აღსანიშნავია, რომ კუნძულ ჰოლოს აეროპორტი მდებარეობს იმ ტერიტორიის სიახლოვეს, სადაც სამთავრობო ჯარები "ისლამურ სახელმწიფოსთან" დაკავშირებულ ტერორისტულ დაჯგუფებას ებრძვიან.
