„პროცედურულად იცით, რომ ცესკო-ს წევრების არჩევის პროცესი იწყება საქართველოს პრეზიდენტის მიერ კონკურსის გამოცხადებით", აცხადებს იურიდიულ საკითხთა კომიტეტის თავმჯდომარე ანრი ოხანაშვილი. მისი განმარტებით, კონკურსის გამოცხადების შემდგომ არსებობს ხუთდღიანი ვადა კანონმდებლობით, რა ვადაშიც უნდა შეიტანონ საბუთები კონკურსანტებმა.
"ასევე პრეზიდენტთან იქმნება საკონკურსო კომისია, რომელიც უზრუნველყოფს შესული კანდიდატიდან ერთ ვაკანსიაზე სამი კანდიდანტის წარდგენას პრეზიდენტისთვის. ამის შემდეგ პრეზიდენტი ერთ ვაკანსიაზე უკვე ორ კანდიდატურას წარუდგენს პარლამენტს.
შემდეგ ეს პროცესი გადმოინაცვლებს პარლამენტში. იცით, რომ კენჭისყრის სხვადასხვა მექანიზმი არის. პირველ შემთხვევაში საჭიროა 100 დეპუტატის მხარდაჭერა. თუ ეს ვერ მოხერხდება, მეორე კენჭისყრა ასევე 2/3-ს, კვლავ 100 ხმით მხარდაჭერას საჭიროებს. იმ შემთხვევაში, თუ ეს ვერ მოხერხდება, არის უკვე 90 ხმით არჩევის შესაძლებლობა და თუ ესეც ვერ ხერხდება, იმისთვის, რომ გამოირიცხოს ამ ინსტიტუციის შეფერხება, საჭირო არის უკვე 76 ხმა, რა შემთხვევაშიც ხდება არჩევა. თუმცა, ამ შემთხვევაში არის არა 5 წლის ვადით არჩეული, არამედ 6 თვის ვადით.
ჩვენ ორიენტირებული ვიქნებით ობიექტური და სამართლიანი პრინციპების დაცვით შევარჩიოთ კანდიდანტი. ჩვენი პრინციპი იქნება, ობიექტურობა, სამართლიანობა და პროფესიონალიზმი. რაც შეეხება ოპოზიციას, იმედი მაქვს, რომ ისინიც ამ პრინციპით იხელმძღვანელებენ. თუ ასე იხელმძღვანელებენ, არის კონსენსუსის რესურსი, თუ ამ პრინციპებით არ იხელმძღვანელებენ, მოგვიწევს ყველა საპარლამენტო მექანიზმის გამოყენება“, - განაცხადა ოხანაშვილმა.
