რუსეთის ელჩი შეერთებულ შტატებში ანატოლი ანტონოვი 3 თვის შემდეგ კვლავ ბრუნდება ვაშინგტონში, რათა შეუდგეს თავისი უფლებამოსილების განხორციელებას.
რუსული მედიის ცნობით, ელჩი ანტონოვი კვირას მოსკოვიდან ნიუ იორკში გაემგზავრა, საიდანაც ვაშინგტონში ჩავა.
რუსეთის ელჩის ვაშინგტონში დაბრუნების კვალდაკვალ, ვრცელდება ცნობები, რომ რუსეთში ამერიკის ელჩი ჯონ სალივანი ემზადება მოსკოვში დასაბრუნებლად.
16 ივნისს, შეერთებული შტატებისა და რუსეთის პრეზიდენტების ჟენევაში გამართული სამიტის შემდეგ ცნობილი გახდა, რომ ორი ქვეყნის ლიდერი შეთანხმდა ელჩების ორმხრივ დაბრუნებაზე.
რუსეთის საგარეო საქმეთა სამინისტრომ შეერთებულ შტატებში რუსეთის ელჩი ანატოლი ანტონოვი მოსკოვში 17 მარტს გაიწვია.
მოსკოვის ამ გადაწყვეტილებას წინ უსწრებდა აშშ-ის პრეზიდენტ ჯო ბაიდენის ინტერვიუ ტელეკომპანია ABC News-სთან, სადაც მან განაცხადა, რომ რუსეთს აშშ-ის საპრეზიდენტო არჩევნებში ჩარევის გამო საფასურის გადახდა მოუწევს.
ამავე ინტერვიუში, ჟურნალისტის მიერ დასმულ შეკითხვაზე, ფიქრობს თუ არა, რომ პუტინი მკვლელია, ბაიდენმა დადებითად უპასუხა.