როგორც ხედავთ, პარლამენტში ვბრუნდებით, ამის შესახებ „ნაციონალური მოძრაობის“ ერთ-ერთმა ლიდერმა რომან გოცირიძემ პარლამენტში, ჟურნალისტებთან საუბრისას განაცხადა. მისი თქმით, ენმ პარლამენტში მივიდა რათა საქმე აკეთოს.
„რა თქმა უნდა, ბოიკოტმა თავისი შედეგი გამოიღო, ვინაიდან სწორედ ამ ბოიკოტის შემდეგ ხდება იმ საკითხების დაძვრა, რასაც პარლამენტში განვიხილავთ, მათ შორის, კონსტიტუციის ცვლილება, საარჩევნო კანონმდებლობა, რაც ყველაზე მნიშვნელოვანია, პოლიტპატიმრების გათავისუფლება და ასე შემდეგ. გადავდივართ სხვა ეტაპზე. ბოიკოტმა თავისი როლი შეასრულა, თავის თავიც ამოწურა.
დღეს ვართ პარლამენტში, რათა ბოლომდე მივიყვანოთ დაწყებული საქმე, ხელი შევუწყოთ ქვეყანაში სამართლიანი, გაუყალბებელი არჩევნების ჩატარებას და მოვიცილოთ ეს წარუმატებელი ხელისუფლება მმართველობიდან“, - აღნიშნავს გოცირიძე.
